मानवीय सहायताकर्मीहरूका लागि सबैभन्दा खतरनाक वर्ष : राष्ट्रसङ्घको चिन्ता

सन् २०२४ लाई मानवीय सहायताको क्षेत्रमा अहिलेसम्मकै सबैभन्दा खतरनाक वर्षका रूपमा संयुक्त राष्ट्रसङ्घले उल्लेख गरेको छ। अघिल्लो वर्षको तुलनामा यो वर्ष सहायता क्षेत्रमा संलग्न कर्मचारीहरूले अझै धेरै जीवन गुमाएका छन् ।

एएफपीको रिपोर्टअनुसार, सन् २०२३ मा ३३ देशमा २८० जना सहायताकर्मीको ज्यान गएको थियो। तर, सन् २०२४ को ११ महिना नपुग्दै यो संख्या २८१ पुगेको छ । मानवीय मामिला तथा आपतकालीन राहत संयोजक टम फ्लेचरले यो स्थितिलाई गम्भीर रूपमा लिँदै युद्धरत पक्षहरूलाई अन्तर्राष्ट्रिय कानून पालना गर्न आग्रह गर्नुभएको छ ।

द्वन्द्वग्रस्त क्षेत्रहरूमा सहायताकर्मीको दुर्दशा

गाजामा भइरहेको आक्रमण, रूस–युक्रेन युद्ध, अफगानिस्तान, कङ्गो, सुडानलगायतका द्वन्द्वग्रस्त क्षेत्रहरूमा सहायताकर्मीहरू अपहरण, उत्पीडन र हिंसाको शिकार भएका छन् ।

फ्लेचरले युद्धरत पक्षहरूलाई मानवताका लागि कम्तीमा सहायताकर्मीको सुरक्षामा ध्यान दिन र दण्डहीनताको युग अन्त्य गर्न जोड दिनुभएको छ। तर, द्वन्द्वको चपेटामा परेका यस्ता सहायताकर्मीहरूको सुरक्षाको सुनिश्चितता अझै चुनौतीपूर्ण देखिन्छ ।

समाधानको खोजी

राष्ट्रसङ्घका अधिकारीहरूले द्वन्द्वग्रस्त देशहरूलाई वार्ता र अन्तर्राष्ट्रिय मान्यताका आधारमा अघि बढ्न सुझाव दिएका छन्। द्वन्द्वका बीचमा मानवताको रक्षा गर्न सबै पक्षले इमानदार प्रयास गर्नुपर्नेमा राष्ट्रसङ्घले बल दिएको छ ।

मानवीय सहायता प्रदान गर्ने यो जोखिमपूर्ण कार्यप्रति सम्मान र सुरक्षाको व्यवस्था नभएसम्म समस्या गहिरिँदै जाने निश्चित देखिन्छ ।