दिवंगत माओवादी नेता राईलाई अध्यक्ष प्रचण्डदेखि कार्यकर्तासम्मले दिए श्रद्धाञ्जली

काठमाडौं । नेकपा (माओवादी केन्द्र)का अध्यक्ष पुष्पकमल दाहाल प्रचण्डलगायत नेता–कार्यकर्ताले पार्टीका दिवंगत केन्द्रीय सदस्य पदमबहादुर राईप्रति श्रद्धाञ्जली व्यक्त गरेका छन् ।

आइतबार पार्टी केन्द्रीय कार्यालय पेरिसडाँडामा स्वर्गीय राईको पार्थिव शरीरमा अध्यक्ष प्रचण्डले पार्टीको झण्डा ओढाएर उनीप्रति श्रद्धाञ्जली अर्पण गरेका हुन् ।

स्वर्गीय नेता राईलाई श्रद्धाञ्जली दिन उपाध्यक्ष एवं प्रवक्ता अग्निप्रसाद सापकोटालगायत माओवादी नेतासँगै सयौँको संख्यामा कार्यकर्तासमेत पेरिसडाँडा पुगेका थिए ।

राईको ५८ वर्षको उमेरमा शनिबार वीर अस्पतालमा निधन भएको थियो ।

अध्यक्ष प्रचण्डले एक विज्ञप्ति जारी गर्दै उनकाे निधनले सिङ्गो पार्टी मर्माहत भएको जनाएका छन् । ‘यस शोकको घडीमा हाम्रो पार्टी दिवंगत कमरेड पदमबहादुर राईप्रति भावपूर्ण श्रद्धाञ्जली अर्पण गर्दछ र शोकसन्तप्त परिवारजनमा गहिरो समवेदना प्रकट गर्दछ,’ विज्ञप्तिमा भनिएको छ ।