नागरिक प्रथमको अपील- राजनीतिक, आर्थिक समस्याको समाधान गर्न सामुहिक प्रयास गरौं

काठमाडौं । नागरिक प्रथम अभियानले  देशको  राजनीतिक, आर्थिक समस्याको समाधान गर्न सामुहिक प्रयास गर्न अपील गरेको छ ।

अभियानले शनिबार एक विज्ञप्ति जारी गर्दै सात वटा संविधानहरु लेखिसक्दा र दर्जनौं सरकारहरु फेरिरहँदा पनि नेपालको राजनीतिक अभिष्ट आज पनि एक चौबाटोमै उभिएको जनाएको छ ।

“देशवासीको  स्वाभिमान प्राप्ति  र समृद्धी आर्जनको यात्राको गतिशील शुरुआत  यी दुइटै आधारभूत आकांक्षाहरु विगत आठ-दशकदेखि नेपाली जनताले गर्दै आएको विभिन्न संघर्ष , आन्दोलन र प्राप्त गरेका साना-ठुला विजयहरुका बाबजुद आज पनि अपूरो नै छन्” विज्ञप्तिमा भनिएको छ, “यस्तै चिन्ता, चिन्तन र बिश्वासका साथ आज बिगतमा विभिन्न संघर्ष र आन्दोलन संग नेत्रित्व तहमा जोडिएका व्यक्तित्वहरु एकै ठाउमा आइ एक नया अठोट गरेका छन् ।”

नागरिक प्रथम अभियन्ता कासिन्द्र कबिरले भने, “आजको राजनीति र राजनीतिज्ञहरुको काम कुरालाई हेर्दा नागरिकहरुका यी आकांक्षाहरु पुरा हुने सम्भावना असम्भव देखिन्छ।”

अर्का अभियन्ता डम्बर खतिवडा भन्छन् “आज देश भरीका प्रगतिशील, लोकतान्त्रिक र समावेशी सोचहरु र प्रयासहरुको एकसाथ आउनु नेपालको राजनीतिक, आर्थिक र सामाजिक विकासको यात्रालाई समृद्ध बनाउने एतिहासिक आवाश्यकता बन्न गएको छ।”

“नागरिकहरुको स्वाभिमान र समृद्धीले नै एक राष्ट्रलाई पनि स्वाभिमानी र समृद्ध बनाएको हुन्छ। त्यसैले स्वशासन र सुशासन दुइटैको केन्द्रमा नागरिक हुन्छन”  अभियन्ता प्रशान्त सिंहले भने, “नागरिक प्रथम, नागरिक पहिलो अथवा People First सुत्रको अवधारणाले काम गरेको राज्यले मात्र स्वशासन र सुशासनको प्रत्याभूति गराउन सक्दछ।”

अर्का अभियन्ता सरोज राय ले भने, “यस एतिहासिक प्रयासमा बिचार, संसाधन र व्यक्तित्वलाइ झनै संगठित गर्दै, प्रत्येक नेपालवासीको स्वाभिमान  र  समृद्धिको संरक्षण र सम्वर्धन गर्न हामी प्रतिबद्ध छौं।”