‘आतंकवादी’ आक्रमणबारे ट्रम्पको प्रतिक्रिया– मेरो भनाइलाई डेमोक्रेटिक पार्टी र फेक मिडियाले खारेज गरेका थिए

काठमाडौं । अमेरिकाका नवनिर्वाचित राष्ट्रपति डोनाल्ड ट्रम्पले न्यू अर्लिन्समा भएको ‘आतंकवादी’ आक्रमणको कडा शब्दमा निन्दा गरेका छन् ।

ट्रम्पले बिहीबार आफ्नो सामाजिक सञ्जाल ट्रुथ सोसलमार्फत देशमा अपराध दर कसैले नदेखेको स्तरमा पुगेको भन्दै चिन्ता व्यक्त गरेका छन् ।

‘जब मैले देशमा आउने अपराधीहरू देशमा रहेका अपराधीहरूभन्दा धेरै खराब छन् भनेँ, मेरो भनाइलाई डेमोक्रेटिक पार्टी र फेक मिडियाले खारेज गरेको थियो, तर अहिले भएको छ सत्य साबित हुँदैछ,’

उनले ट्रुथ सोसलमा लेखेका छन्, ‘हाम्रो देशमा अपराध दर कसैले नदेखेको स्तरमा पुगेको छ ।’

ट्रम्पले आफूहरू न्यू अर्लिन्सका साहसी प्रहरी अधिकारीहरूको साथमा रहेको बताएका छन् ।

‘हाम्रो हृदय सबै निर्दोष पीडितहरू र उनीहरूका परिवारहरूसँग छ । साथै, हामी न्यू अर्लिन्सका साहसी प्रहरी अधिकारीहरूको साथमा छौं । ट्रम्प प्रशासनले यस बर्बर घटनाको अनुसन्धानमा न्यू अर्लिन्स शहरलाई पूर्ण सहयोग गर्नेछ,’ उनले भनेका छन् ।

रिपब्लिकन पार्टीका नेता ट्रम्पले यसै महिनाको २० तारिखमा अमेरिकी राष्ट्रपतिको पदभार ग्रहण गर्नेछन् ।

अमेरिकामा एक व्यक्तिले भीडमा ट्रकले किचेर १५ व्यक्तिको हत्या गरेका छन् भने ३५ जना घाइते भएका छन् ।

अमेरिकामा भीडमा पिक-अप ट्रक कुदाएको घटना : मृत्यु हुनेको संख्या १५ पुग्यो, ३५ जना घाइते