चिनियाँ नागरिकको अपहरण आरोपमा भीमफेदीबाट चार भारतीय पक्राउ

काठमाडौं । चिनियाँ नागरिक अपहरणको आरोपमा चारजना भारतीय नागरिकलाई प्रहरीले पक्राउ गरेको छ । उनीहरूलाई बुधबार मकवानपुरको भीमफेदीबाट नियन्त्रणमा लिइएको हो ।

काठमाडौंबाट मङ्गलबार चिनियाँ नागरिक अपहरण गर्ने कार्यमा संलग्न भएको अभियोगमा भीमफेदी गाउँपालिका –६ स्थित जुरिखेतबाट भारतीय नागरिकलाई प्रहरीले नियन्त्रणमा लिइएको इलाका प्रहरी कार्यालय भीमफेदीले जनाएको छ ।

पक्राउ पर्नेमा भारत महाराष्ट्र राज्य सतरा जिल्लाका वर्ष ३२ का आशुतोष दत्तात्रेय, महाराष्ट्र राज्य सतरा जिल्ला हमद नगरका वर्ष ३० का अमोल करमाटे, महाराष्ट्रका वर्ष ४० का अफसर सेख र वर्ष ३३ का अमोल श्रीसत रहेका छन् ।

इलाका प्रहरी कार्यालय भीमफेदीकी प्रहरी निरीक्षक ललिता ढकाल नेतृत्वको टोलीले हेटौँडा–भीमफेदी–कुलेखानी–काठमाडौं सडक खण्डमा गन्तव्यमा गइरहेको गाडीमा खोजतलाश गर्नेक्रममा चार जनालाई जुरिखेतबाट नियन्त्रणमा लिएको थियो ।

उनीहरू सवार एमएच १६ डीजी ४९०४ नम्बरको भारतीय गाडीलाई पनि प्रहरीले नियन्त्रणमा लिएको छ ।

प्रहरी निरीक्षक ढकालका अनुसार अपहरणमा पर्ने र अपहरण गर्ने समूह अपराधमा संलग्न रहेको बुझिएको छ । चिनियाँ नागरिकले अवैध खेल खेलाएर ठगी गरेको भन्दै भारतीय नागरिकले उनलाई गाडीमा राखेर काठमाडौंको एक होटलबाट अपहरण गरेको पाइएको छ ।

चारैजनालाई अनुसन्धान र आवश्यक कारबाहीका लागि काठमाडौं उपत्यका अपराध अनुसन्धान कार्यालय टेकुबाट खटिआएको प्रहरी टोलीको जिम्मा लगाएको प्रहरी निरीक्षक ढकालले जानकारी दिइन् ।