ब्राजिलमा प्रहरीसँगको गोली हानाहानबाट ६ संदिग्ध व्यक्तिको मृत्यु

साओ पावलो । ब्राजिलको दक्षिणी पराना राज्यको पोन्टा ग्रोसा नगरपालिकामा प्रहरीसँगको गोली हानाहानमा ६ जना संदिग्ध व्यक्तिको मृत्यु भएको स्थानीय अधिकारीहरूले बताएका छन् ।

प्रहरीले अवैध हतियार बरामद गर्न गएको क्रममा गोली चलेको हो ।

प्रहरीका अनुसार आपराधिक सङ्गठनले हतियार भण्डारण गरिरहेको थियो । साथै, पराना राज्यका साना सहरहरू तथा बैङ्कहरूमा आक्रमण गर्ने योजना बनाएको थियो ।

‘छापा मार्दा ६ संदिग्ध मारिए र कुनै प्रहरीहरू घाइते भएनन् । प्रहरीले सेनाले प्रयोग गर्ने राइफलसहितका हतियारहरू बरामद गरेको छ,’ प्रहरी कार्यालयले भनेको छ ।