एनकेएलमा जनकपुर नाइट्सको लगातार दोस्रो जित

काठमाडौं। रेडमा उत्कृष्ट प्रदर्शन गर्दै जनकपुर नाइट्सले नेपाल कबड्डी लिग (एनकेएल)मा लगातार दोस्रो जित हात पारेको छ।
त्रिपुरेश्वरस्थित दशरथ रंगशालामा मंगबार सम्पन्न खेलमा जनकपुरले धनगढी वाइल्डक्याट्सलाई ३७–३१ ले पराजित गर्दै जित हात पारेको हो ।

यो  जितसँगै जनकपुर १० अंकसहित शीर्ष स्थानमा उक्लिएको छ भने  समान खेल खेलेको धनगढीको एक अंक छ।

पहिलो खेलमा जनकपुरले हिमालयन रेडर्सलाई ३५-२४ ले हराएको थियो। धनगढी भने पहिलो खेलमा विराटनगर ब्यान्डिट्ससँग ४६-३४ ले पराजित भएको थियो। जनकपुरले रेडबाट २४, ट्याकलबाट ९ अलआउटबाट चार र बोनस पोइन्टबाट ६ अंक जोडेको हो। धनगढीले भने रेडबाट २७, ट्याकलबाट चार र बोनसबाट ११ अंक जोड्यो।

सुरुआती समयमा धनगढीले पनि जनकपुरलाई दबाबमा राखेको थियो। तर, ट्याकलमा कमजोर हुँदा धनगढी पहिलो हाफमै दुईपल्ट अलआउट हुन पुग्यो। जनकपुरले भने ट्याकलमा सानदार प्रदर्शन गर्दै ६ अंक जोड्यो। धनगढीले भने दुई अंक मात्रै जोड्न सकेको थियो। रेडमा दुवैले समान ६ अंक जोडे पनि एक्स्ट्रा पोइन्ट जनकपुरले बढी पायो। योसँगै जनकपुपरले पहिलो हाफमै सात अंकको अग्रता लिन सफल भयो।

पहिलो हाफ  २१–१३ मा सकिएको थियो। दोस्रो हाफमा धनगढीले १८ र जनकपुरले १६ पोइन्ट जोडेको थियो। दोस्रो हाफको सुरुआतमै धनगढी एकपल्ट अलआउटनजिक पुगिसकेको थियो। तर, विदेशी खेलाडी एनसिन अरफातले रेडमा दुई जनालाई आउट गराउँदै धनगढीलाई बचाए। तर, त्यसको दुई मिनेटपछि नै अहङ्गमा पोल्वाथाहलाई ट्याकल गर्दै जनकपुरले अलआउट बनाइ छाडे। योसँगै जनकपुर स्कोर २९–१९ बनाउँदै १० अंकको अग्रता लिन सफल भयो।

त्यसपछि धनगढी खेलमा फर्किन सकेन। जनकपुरले दोस्रो हाफमा पनि दुईपल्ट अलआउट बनाएको थियो। धनगढीले दोस्रो हाफमा १८ अंक जोड्दै पुनरागमन गर्ने प्रयास गरेको थियो। उसले रेड र ट्याकलमा पनि सुधार गर्दै १२ अंक जोड्यो। जनकपुरले रेड र ट्याकलबाट एक अंक मात्रै बढी जोडेको थियो। बोनस पोइन्टबाट ६ अंक जोड्दा पनि धनगढीले अग्रता उल्टाउन सकेन र लगातार दोस्रो खेलमा पराजय बेहोर्न पुग्यो।