केपी ओली कप फागुन ११ गतेदेखि

काठमाडौं । केपी ओली कप फुटबल प्रतियोगिताको तेस्रो संस्करण फागुन ११ गतेदेखि सुरु हुने भएको छ ।

बुधबार आयोजित पत्रकार सम्मेलनमा केपी ओली कपको उद्घाटन फागुन ११ मा सुरु भएर १९ गते समापन हुने आयोजक राष्ट्रिय युवा सङ्घ नेपालले जानकारी दिएको छ ।

प्रतियोगितामा ए डिभिजन क्लब र विदेशी क्लबगरी कुल १० टोलीले प्रतिस्पर्धा गर्नेछन् ।

प्रतियोगिताको क्वाटरफाइनलसम्मका खेल सातदोबाटोस्थित एन्फा कम्प्लेक्समा खेलाइने छ । सेमिफाइनल तथा फाइनल खेल दशरथ रङ्गशालामा हुनेछ ।

विजेताले नगद १५ लाख ११ हजार १११ रुपैयाँ प्राप्त गर्नेछ भने उपविजेताले ५ लाख रुपैयाँ प्राप्त गर्नेछ ।

यसैगरी उत्कृष्ट खेलाडीले नगद १ लाख, उत्कृष्ट गोलकिपर र सर्वाधिक गोलकर्तालाई समान ५० हजार तथा उत्कृष्ट उदीयमान खेलाडीलाई पनि ५० हजार रुपैयाँ प्रदान गरिनेछ ।

हरेक खेलको विजेता टिमलाई २५ हजार र हरेक खेलको प्लेयर अफ दि म्याचलाई १५ हजार दिइनेछ । यसअघि केपी ओली कपको दुवै संस्करणको उपाधि मच्छिन्द्र एफसीले उचालेको थियो ।