ममता कुलकर्णी दिनमा हवन गर्थिन् र रातमा रक्सी पिउँथिन् ?

काठमाडौं । बलिउड अभिनेत्री ममता कुलकर्णी विदेशबाट भारत फर्किएदेखि नै चर्चामा छिन् ।

चलचित्र क्षेत्र छाडेर आफू लामो समयदेखि आध्यात्मिक यात्रामा रहेको उनले दाबी गरेकी छन् ।

हालै उनलाई किन्नर अखाडाको महामण्डलेश्वरसमेत बनाइएको थियो । तर, त्यहाँ सन्तहरूले व्यापक विरोध गरेपछि उनलाई हटाइयो ।उनी केवल सात दिन मात्र महामण्डलेश्वर बनिन् ।

यसैबीच आफूले २३ वर्षदेखि कुनै पनि वयस्क फिल्म नहेरेको बताएकी छन् । यस क्रममा ममताले नवरात्रिको ९ दिन उपवास बस्दा भएको विवादबारे पनि मुख खोलेकी छन् ।

उनीविरुद्ध के आरोप छ भने उनी दिनभर व्रत बस्ने तर रातमा दुई पेग पिउँथिन् । उनी ताज होटल जान्थिन् । यो त्यतिबेलाको कुरा हो, जतिबेला उनी फिल्ममा काम गरिरहेकी थिइन् । यस विषयमा धेरै विवाद भएको थियो ।

भारतीय सञ्चारमाध्यमकाअनुसार ममताले भनिन्, “जतिबेला म बलिउडमा थिएँ, सन् १९९७ मा मेरो जीवनमा मेरो गुरु आउनुभयो । बलिउडमा काम गर्दा मेरो जीवन कडा दिनचर्यामा चल्थ्यो । म सुटिङमा जाँदा तीनवटा झोला बोकेर जान्थेँ । एउटा झोलामा मेरा लुगाहरू थिए भने अर्को झोलामा मेरो पोर्टेबल टेम्पल थियो । यो मन्दिर मेरो कोठाको टेबलमा बनाइएको थियो, जहाँ म काममा जानुअघि पूजा गर्थें । यो अनुष्ठान पूरा गरेपछि मात्र म मेरो सुटिङ तालिकामा जान्थेँ ।”

ममताले थप भनिन्, “म नवरात्रमा व्रत बस्थेँ । यो नवरात्र नौ दिनको सिद्धि हो । मैले बिहान, दिउँसो र साँझ तीन पटक उपवास बस्ने र हवन गर्ने सङ्कल्प गरेकी थिएँ । मैले नौ दिनसम्म पानी मात्र पिएँ । मैले ३६ किलोग्राम चन्दन प्रयोग गरेर यज्ञ गरेँ ।”

“मेरो डिजाइनर, जो त्यतिबेला बलिउडबाट थिए,” एक दिन मलाई भने, ‘ममता, तिमी के गर्दै छौ ? तिमी धेरै गम्भीर भइसक्यौ । उठ, नौ दिन धेरै लामो भयो, अब जाऔँ ।”

उनले भनिन्, “त्यसपछि हामी ताज हेर्न गयौँ । यसरी नै एक वा दुई नवरात्र बित्यो । म स्कच पिउँथेँ, तर दुई पेग पिएपछि मलाई बाथरुम जान हतार हुन्थ्यो । यस्तो लाग्थ्यो- रक्सीको नशा मेरो दिमागमा गाडिइसक्यो । नौ दिनको तपस्या र पोषणको अभावले मलाई थकित बनायो । मलाई मेरो भित्री भाग जलिरहेको जस्तो महसुस भयो ।”