उत्तरी म्यासेडोनियाको नाइटक्लबमा आगलागी, ५१ जनाको मृत्यु

काठमाडौँ । 

उत्तरी म्यासेडोनियाको नाइटक्लबमा आगलागी हुँदा ५१ जनाको मृत्यु भएको छ । आगलागीमा कम्तीमा ५१ जनाको मृत्यु भएको छ भने १०० भन्दा बढी घाइते भएको बीबीसीले उल्लेख गरेको छ ।

देशको पूर्वी भागमा रहेको कोकानी शहरमा रहेको पल्स क्लबमा आगलागी भएको बताइएको छ । यो ठाउँ म्यासेडोनियाको राजधानी स्कोप्जेबाट लगभग सय किलोमिटर टाढा छ । सामाजिक सञ्जालमा पोस्ट गरिएका तस्बिरहरूमा आगो र धुवाँले भरिएको एउटा भवन देखिन्छ ।

प्राप्त जानकारी अनुसार स्थानीय समय अनुसार आइतबार बिहान करिब ३ बजे आगलागी भएको थियो । यो दुर्घटना ब्यान्ड एडीएनको प्रस्तुतिको क्रममा भएको थियो ।

यस ठाउँबाट धेरै घण्टासम्म आगोको ज्वाला उठिरह्यो । उक्त समारोहमा करिब १,५०० जना उपस्थित भएको बताइएको छ । स्थानीय सञ्चारमाध्यमले आगलागी आतिशबाजी उपकरणहरूबाट भएको हुन सक्ने बताएका छन्।