एसईईलाई लक्षित गरी दुवै समूहले पछि सारे प्रदर्शनको समय

काठमाडौं । गणतन्त्रवादी र राजसंस्थावादी दुवैले माध्यमिक शिक्षा परीक्षा (एसईई)लाई मध्यनजर गर्दै प्रदर्शनको समय पछि सारेका छन् ।

आज (शुक्रबार) काठमाडौंमा प्रदर्शनको तयारी गरिरहेका उनीहरूले प्रदर्शन मध्यान्ह १२ बजेदेखि सुरु गर्ने बताएका छन् । यसअघि बिहान ११ बजेका लागि समय तय गरिएको थियो ।

राजसंस्था पुनस्र्थापनाका लागि संयुक्त जनआन्दोलन समितिका प्रवक्ता स्वागत नेपालले पहिले ११ बजे तय भएको कार्यक्रम सारिएको जानकारी दिए । भक्तपुरबाट हिँड्ने गरी तालिका बनाइएकोमा अहिले साढे ११ बजे पुरानो ठिमीको कमेरोटारमा भेला हुने तय भएको उनले बताए ।

यस्तै एसईई परीक्षा ११ बजेसम्म चल्ने भएकोले समाजवादी मोर्चा नेपालले मोर्चाले शुक्रबार भृकुटीमण्डपमा हुने प्रदर्शनलाई १२ बजे सारिएको एकीकृत समाजवादीका पोलिटब्युरो सदस्य लक्ष्मण केसीले जानकारी दिए ।

देशमा आज गणतन्त्र भर्सेस राजतन्त्रको स्थिति देखा पर्ने भएको छ ।

गणतन्त्र र राजतन्त्र पक्षधर दुवैले आज काठमाडौंमा शक्ति प्रदर्शन गर्दैछन् ।

भृकुटीमण्डपमा गणतन्त्र पक्षधर समाजवादी मोर्चा र तीनकुनेमा राजसंस्था पक्षधरले प्रदर्शन गर्दैछन् । समाजवादी मोर्चामा आबद्ध नेकपा (माओवादी केन्द्र), नेकपा (एकीकृत समाजवादी), नेपाल समाजवादी पार्टी र विप्लव नेतृत्वको नेकपाले भृकुटीमण्डपमा प्रदर्शन गर्ने भएका हुन् ।

यस्तै मेडिकल व्यवसायी दुर्गा प्रसाईं नेतृत्वको ‘राष्ट्र, राष्ट्रियता, धर्म, संस्कृति र नागरिक बचाउ महाअभियान’को ब्यानरमा पूर्वराजाका समर्थकहरूले तीनकुनेमा प्रदर्शन गर्दैछन् । नवराज सुवेदी नेतृत्वको ‘राजसंस्था पुनस्र्थापनाका लागि संयुक्त जनआन्दोलन समिति’ले प्रसाईंसँगै मिलेर प्रदर्शन गर्न लागेका हुन् ।

बिहीबार मात्रै समितिका संयोजक सुवेदीले प्रसाईंलाई आन्दोलनको कमान्डर तथा स्वागत नेपाललाई प्रवक्ता तोकेका थिए । दुवै पक्षले आज सडकमा विशाल जनसागर उतार्ने दाबी गरिरहेका छन् ।

समाजवादी मोर्चाले अहिले नेपाल पर्यटन बोर्ड र राष्ट्रिय सभागृह अगाडिको मुख्य सडकमै स्टेज निर्माण गरिरहेको छ । सवारीसाधन भने बिहानैदेखि डाइभर्ट गरिएको छ ।

सडकमा गणतन्त्र भर्सेस राजतन्त्र, सम्भावित मुठभेड रोक्न ठूलो सङ्ख्यामा प्रहरी परिचालन