नेपाली सेनाले मनायो जनसम्पर्क तथा सूचना निर्देशनालय दिवस

काठमाडौँ।

नेपाली सेनाले जनसम्पर्क तथा सूचना निर्देशनालयको स्थापना दिवस बुधबार विभिन्न कार्यक्रम गरी मनाएको छ। प्रधान सेनापति अशोक राज सिग्देलको प्रमुख आतिथ्यमा जङ्गी अड्‍डामा विविध कार्यक्रमसहित उक्त दिवस मनाएको हो।

नेपाली सेनालाई प्राप्त जिम्मेवारीहरूको सम्पादन तथा यसले गरेका विविध कार्यहरू आम नागरिकसम्म पुर्‍याउने उद्देश्यले वि.सं. २०५८ साल चैत २० गते स्थापना भएको यस निर्देशनालयको यो २३ औँ वार्षिकोत्सव हो ।

समारोहमा नेपाली सेना लघु चलचित्र प्रतियोगिता-२०८१ का उत्कृष्ट तीन चलचित्र प्रदर्शन तथा पुरस्कार वितरण, उपरथी श्री आश बहादुर तामाङ्ग पिएच.डी. (अवकाश प्राप्त) द्वारा रचित कविता, गजल र लेखहरुको संग्रह सिपाहीको कलमबाट अङ्क-२ विमोचन, सिपाही वार्षिक-२०८१ मा प्रकाशित लेखहरुमध्ये उत्कृष्ट तीन लेख रचनाका सर्जकहरुलाई एवं मुल्याङ्कन समितिका सदस्यहरु लगायत नेपाली सेना फोटो तथा बृहत् प्रदर्शनी-२०८१ मा उत्कृष्ट ३ वटा नेपाली सेनाका युनिटहरुलाई प्रमाण-पत्र, कदरपत्र तथा पुरस्कार वितरण गरिएको थियो ।

जनसम्पर्क तथा सूचना निर्देशक तथा सैनिक प्रवक्ता सहायक रथी श्री गौरव कुमार के.सी.को स्वागत मन्तव्यसहित सुरु भएको कार्यक्रममा सैनिक श्रीमती संघकी अध्यक्ष, बलाधिकृत, बलाध्यक्ष, रथीवृन्द, निर्देशनालयका पूर्व निर्देशकहरु, सैनिक श्रीमती संघका पदाधिकारीहरु, चलचित्र विकास बोर्डका अध्यक्ष, अधिकृतहरुका साथै विविध प्रतियोगिताको मूल्याङ्कन समितिका सदस्यहरु, लघु चलचित्र प्रतियोगीहरु, प्राध्यापक, लेखक, सञ्‍चारकर्मी, कलाकार लगायतको उपस्थिती थियो ।