बिर्तामोडमा जेठ ३ देखि वडा स्तरिय भलिबलको प्रतियोगिता

बिर्तामोड, १ जेठ । बिर्तामोड नगरपालिका वडा नं. ९ खेलकुद विकास समितिको आयोजना वडास्तरीय पुरुष भलिबल प्रतियोगिता २०८२ हुने आयोजना हुने भएको छ। 

वडा खेलकुद समिति र नगर खेलकुद विकास समितिको सह-आयोजनामा आगामी जेठ ३ र ४ गते दुर्गा माविको खेल मैदान प्रतियोगिता आयोजन गर्न लागिएको हो ।

प्रतियोगितामा बिर्तामोड नगरपालिका अन्तर्गत वडा नं. १ देखि १० सम्मका वडाका  टिमको सहभागिता रहने आज वडा कार्यालयमा आयोजित पत्रकार भेटघाटमा वडा खेलकूद विकास समितिका अध्यक्ष विश्वदीप राजवंशीले जानकारी दिनुभयो । 

प्रतियोगिताको उद्देश्य वडास्तरमा रहेका खेलाडीहरूको प्रतिभा उजागर गर्नु, युवामा खेलप्रतिको आकर्षण बढाउनु तथा खेलकुदको माध्यमबाट वडा र नगरबीच आपसी स‌द्भाव तथा सहकार्य विस्तार गर्नु रहेको उहाँले बताउनुभयो ।

प्रतियोगिताको प्रथम स्थान हासिल गर्ने टोलीले नगद रु. ३१ हजार र द्वितीय स्थान हासिल गर्ने टोलीले नगद रु. २१ हजार प्राप्त गर्नेछन् । प्रतियोगिता अन्तर्गत म्यान अफ द म्याच, सर्वोत्कृष्ट सर्भर, सर्वोत्कृष्ट स्पाइकर, सर्वोत्कृष्ट ब्लकर, सर्वोत्कृष्ट सेटर लगायतका व्यक्तिगत विधागत पुरस्कारहरू पनि प्रदान गरिनेछ । प्रतियोगिता सम्पन्न गर्नका लागि अनुमानित खर्च रु. ५ लाख ३२ हजार २ सय लाग्ने अनुमान गरिएको छ। 

खेलकुद विकासका लागि वडाले सक्दो प्रयास गरिरहेको वडाध्यक हरिप्रसाद चम्लागाईले बताउनुभयो । वडासंग पर्याप्त बजेट नभए पनि भएको बजेटलाई सदुपयोग गरिँदै आएको उहाँले बताउनु भयो । 

पत्रकार सम्मेलनमा बिर्तामोड नगर खेलकुद विकास समितिका सचिव विसन लिम्बुले प्रतियोगिता सम्पन्न गर्न नगर खेलकुद विकास समितिले केही आर्थिक सहयोग गर्ने बताउनुभयो । प्रतियोगिता सफल बनाउन आफूहरूले कुनै कसर बाँकी नराख्ने उहाँको भनाई छ। 

वडा सचिव सुवास बिकले भलिबल प्रतियोगिताका लागि वडाले रु. २ लाख बजेट विनियोजन गरेर सम्झौता समेत गरिसकेको बताउनुभयो । प्रतियोगिताको प्रविधिक पक्षका विषयमा अफिसियल रेफ्री नविन रिजालले प्रष्ट पार्नुभएको थियो।  

प्रतियोगिताका लागि मुख्य प्रायोजकको लागि २ लाख ५० हजार, सह-प्रायोजकको लागि १ लाख ५० हजार, प्रायोजकको लागि ५० हजार र सपोर्टरको रुपमा २५ हजार सम्म लिइएको पत्रकार भेटघाटमा जानकारी दिइयो।

The post बिर्तामोडमा जेठ ३ देखि वडा स्तरिय भलिबलको प्रतियोगिता appeared first on Jhapa Online.