राप्रपा अध्यक्ष लिङ्देनद्वारा पुल उद्घाटन : हल्दिबारीबाट १५० काठेपुल विस्थापित

सन्तोष शर्मा
हल्दिबारी, ७ जेठ । झापाको हल्दिबारी गाउँपालिकाको वडा नं. ५ र १ जोड्ने भुतेनी खोलामा पुल निर्माण भएको छ ।

आज राष्ट्रिय प्रजातन्त्र पार्टीका अध्यक्ष एवम् झापा क्षेत्र नं. ३ का सांसद् राजेन्द्र लिङ्देनले शिलालेख अनावरणसँगै रिबन काटेर पुलको उद्घाटन गर्नुभयो । कार्यक्रममा सम्बोधन गर्नुहुँदै अध्यक्ष लिङ्देनले पुल यस क्षेत्रको विकासमा योगदान पुर्याउने बताउनुभयो । उहाँले जनप्रतिनिधिसँग सपना, योजना र इमान्दारी भए विकासमा कुनै अवरोध नआउने बताउनुभयो ।

“हल्दिबारीले यहाँको सर्वाङ्गिण विकासमा जुन फड्को मारिरहेको छ, म त्यसका लागि सबैलाई बधाइ दिन्छु”, उहाँले भन्नुभयो ।

हल्दिबारीमा काठेपुल विस्थापित भएको छ । हालसम्म १५० वटा काठेपुल विस्थापित गरी पुल र कल्भर्ट निर्माण गरिएको गाउँपालिका अध्यक्ष रविन्द्र लिङ्देन बताउनुभयो । योसँगै भुसुडी खोलामा थप दुई वटा पुल निर्माण सम्पन्न हुन लागेको उहाँले बताउनुभयो ।

कार्यक्रममा नेकपा एमाले हल्दिबारी अध्यक्ष त्रिलोचन सपाकोटाले कम लागत र समयमै पुल निर्माण हुनु सुखद भएको बताउनुभयो । गाउँपालिकाले राजनीतिक पूर्वाग्रह नराखी नयाँ र पुराना योजना सञ्चालन गरिरहेको बताउनुहुँदै उहाँले स्थानीय तहकै बजेटमा पुल निर्माण हुनु गौरवको विषय बनेको उल्लेख गर्नुभयो ।

हल्दिबारी गाउँपालिकाको आफ्नै बजेटबाट भुतेनी खोलाम एउटा र भुसुडी खोलमा दुई वटा रू चार करोड ९६ लाख ८५ हजार ९ सय २८ को लागत निर्माण भएको नगरपालिकाका प्रमुख प्रशासकीय अधिकृत मानबहादुर वन (महेन्द्र)ले जानकारी दिनुभयो ।

आज भुतेनी खोलामा उद्घाटन गरिएको पुलको लागत रू दुई करोड ३० लाख रहेको छ भने लम्बाई ४२.७ मिटर र चौडाई ७.२ मिटर रहेको छ । पुल निर्माणको ठेक्का सारा सृष्टि निर्माण सेवा प्रालिले पाएको थियो । गाउँपालिकाले दुई वर्षभित्र पुलको निर्माण कार्य सम्पन्न गर्नेगरी निर्माण कम्पनी सारा सृष्टिसँग गत २०७९ मंसीर ७ गते सम्झौता गरेको न्यौपानेले बताउनुभयो ।

पुल निर्माण भएसँगै हल्दिबारी गाउँपालिकासँग हल्दिबारी–१ बासीको सिधा सम्पर्क भएको छ भने वडा नं. ५ र १ का हजारौं स्थानीयबासी लाभान्विन भएको नगरपालिकाका योजना शाखा प्रमुख राजन न्यौपानेले जानकारी दिनुभयो । वर्षायाममा आवातजावत गर्न सास्ती व्यहोरिरहेका नजिकै रहेको धनुषा आधारभूत विद्यालयका विद्यार्थीलाई समेत पुल निर्माण भएपछि सहज भएको छ ।

The post राप्रपा अध्यक्ष लिङ्देनद्वारा पुल उद्घाटन : हल्दिबारीबाट १५० काठेपुल विस्थापित appeared first on Jhapa Online.