म्याक्रोनमाथि ट्रम्पको टिप्पणी : सधैँ गलत कुरा बोल्ने व्यक्ति

काठमाडौं । अमेरिकी राष्ट्रपति डोनाल्ड ट्रम्पले फ्रान्सेली राष्ट्रपति इमानुएल म्याक्रोनलाई ‘सधैँ गलत कुरा बोल्ने व्यक्ति’ भएको आरोप लगाएका छन् ।

ट्रम्पले सामाजिक सञ्जालमार्फत् म्याक्रोनलाई ’प्रचार खोज्ने’ व्यक्तिको रूपमा वर्णनसमेत गरेका छन् ।

फ्रान्सेली राष्ट्रपति म्याक्रोनले एक दिनअघि जी–७ शिखर सम्मेलनबाट ट्रम्पको फिर्तालाई ’इरान र इजरायल बीचको युद्धविराम’सँग जोडेका थिए ।

यसैको जवाफ दिँदै ट्रम्पले म्याक्रोनको भनाइ गलत भएको बताएका हुन् ।

‘सधैँ प्रचार खोज्ने फ्रान्सेली राष्ट्रपति इमानुएल म्याक्रोनले भनेछन्– म क्यानडामा भएको जी–७ शिखर सम्मेलन छोडेर इजरायल र इरानबीच ’युद्धविराम’ गराउन वासिङ्टन डीसी फर्किरहेको छु । यो गलत हो,’ उनले भनेका छन्, ‘म वासिङ्टन फर्किनुको युद्धविरामसँग कुनै सम्बन्ध छैन । जानाजानी होस् वा अन्जानमा, म्याक्रोनले सधैँ गलत कुरा बोल्छन् ।’