लेबनान र गाजाका अस्पतालमा इजरायली ड्रोन आक्रमणः दुई स्वास्थ्यकर्मीको मृत्यु, एक बालक घाइते

काठमाडौं– दक्षिणी लेबनान र उत्तरी गाजाका अस्पतालमा इजरायली सुरक्षा फौजले गरेको ड्रोन आक्रमणमा परी दुई लेबनानी स्वास्थ्यकर्मीको मृत्यु भएको छ भने एक प्यालेस्टिनी बालक गम्भीर घाइते भएका छन् ।

इजरायली सुरक्षा बलहरूले गाजाको उत्तरी क्षेत्रस्थित कमाल अदवान अस्पतालमा साेमबार बिहान आक्रमण गर्दा ती बालक घाइते हुनका साथै अस्पतालको नर्सरीमा समेत क्षति पुगेको अलजजिराले जनाएको छ ।

त्यस्तै, इजरायलले दक्षिणी लेबनानको एक स्वास्थ्य केन्द्रमा आक्रमण गर्दा दुई स्वास्थ्यकर्मीको ज्यान गएको हो ।

यसैगरी कमाल अदवान अस्पताल नजिकैको इन्डोनेशियन अस्पतालको गेट र पर्खालमा पनि इजरायली ड्रोनले आक्रमण गरेको छ ।

पछिल्ला दिनहरूमा इजरायलले उत्तरी गाजा र दक्षिणी लेबनानमा निरन्तर आक्रमण गरिरहेको छ ।