दार्चुला जीप दुर्घटना : गम्भीर घाइते तीन जनालाई हेलिकोप्टरमार्फत् धनगढी लगियो

धनगढी । दार्चुलामा जीप दुर्घटना हुँदा गम्भीर घाइते भएका तीन जनालाई हेलिकोप्टरमार्फत् धनगढी लगिएको छ ।

जीप चालक दार्चुलाको मालिकार्जुन गाउँपालिका–८ पस्तीका ३० वर्षीय सुनिल जोशी, बैतडीको डिलाशैनी गाउँपालिका–५ का २८ वर्षीय उत्तम रोकाया र दार्चुलाको शैल्यशिखर नगरपालिका–५ लेकगाउँका ८ वर्षीय सन्दीप रावललाई हेलिकोप्टरमार्फत उद्धार गरिएको हो ।

घाइते पाँचमध्ये तीन जनालाई थप उपचारका लागि नेपाली सेनाको हेलिकोप्टरमार्फत धनगढी लगिएको शैल्यशिखर नगरपालिकाका प्रमुख प्रशासकीय अधिकृत सुरेन्द्रबहादुर विष्टले बताए ।

शुक्रबार बिहान स्थानीय मालिकार्जुन मन्दिरमा लागेको जात्रा हेरेर फर्किने क्रममा दर्शनार्थी बोकेको जीप दुर्घटनामा परेको हो ।

दुर्घटनामा परी आठ जनाको मृत्यु भइसकेको छ ।