भक्तपुरमा ट्याक्टर दुर्घटना: एक जनाको मृत्यु, पाँच घाइते

काठमाडौँ।

भक्तपुरमा ट्याक्टर दुर्घटना हुँदा एक जनाको मृत्यु भएको छ । पाँच जना घाइते भएका छन्। मृत्यु हुनेमा चाँगुनारायण नगरपालिका-५ का ४५ वर्षीय गोविन्द सुवाल रहेका छन्।

चाँगुनारायणबाट डेकोचातर्फ जाँदै गरेको ना२त ९३४० नम्बरको ट्याक्टर चाँगुनारायण नगरपालिका-५ पिखेलमा शुक्रबार साँझ दुर्घटना भएको थियो। दुर्घटनामा गम्भीर घाइते भएका सुवालको उपचारका क्रममा अन्नपूर्ण न्यूरो अस्पताल, काठमाडौंमा मृत्यु भएको जिल्ला प्रहरी कार्यालय भक्तपुरले जनाएको छ।

सोही ट्याक्टरमा सवार भक्तपुर नगरपालिका-२ व्यासीका ४८ वर्षीय गणेश सुवाल घाइते भएका छन् । उनको भक्तपुर अस्पतालमै उपचार भइरहेको छ । सामान्य घाइते भएका अन्य ४ जना भने डिस्चार्ज भइसकेका छन् ।