झापामा छुट्टाछुट्टै घटनामा चार जनाको मृत्यु

बनियानी, २ मंसिर । झापाका विभिन्न स्थानमा भएका छुट्टाछुट्टै घटनामा चार जनाको मृत्यु भएको छ ।

झापाको बाह्रदशी गाउँपालिकामा, झापा गाउँपालिकामा, बिर्तामोड नगरपालिका र दमक नगरपालिकामा भएको छुट्टाछुट्टै घटनामा एक÷एक जनाको मृत्यु भएको जिल्ला प्रहरी कार्यालय झापाका प्रवक्ता प्रहरी नायब उपरीक्षक कृष्णकुमार चन्दले जानकारी दिनुभयो ।

शनिबार राति ९ः२० बजे बाह्रदशी–५ फुलबारीका २६ वर्षीय मानकुमार राजवंशीले सोही स्थानका ४५ वर्षीय गंगालाल माझीलाई पुरानो रिसीविको कारण विवाद गरेर फलामको रडले टाउकोमा प्रहार गरेपछि गंगालालको मृत्यु भएको छ ।

मानकुमारलाई फलामको रडसहित नियन्त्रणमा लिई इलाका प्रहरी कार्यालय अनारमनीमा राखेर थप अनुसन्धान भइरहेको प्रवक्त चन्दले बताउनुभयो ।

यस्तै, गत कात्तिक २८ गतेदेखि घर छोडेर हिँडेका झापा गाँउपालिका–४ खयरबारीका ६५ वर्षीय गणेशबहादुर खत्री आइतबार झापा–१ स्थित माईखोलामा पानीमा डुबेर मृत अवस्थामा फेला परेका छन् ।

घरमा कसैलाई नसोधी घर छोडी हिँडेको भनेर आफन्तले कात्तिक २८ गते नै प्रहरी चौकी टाघनडुब्बामा जानकारी गराएपछि उनको खोजी थालिएको थियो । सोही क्रममा उनलाई माईखोलामा डुबेर मृत्यु भएको अवस्थामा फेला पारेको हो ।

त्यस्तै, गएराति झापाको दमक नगरपालिका–३ दिपज्योति टोलमा जंगली हात्तीको आक्रमणबाट सोही स्थानका ४५ वर्षी मीनबहादुर भण्डारीको मृत्यु भएको छ । हात्तीले सोही स्थानका सुबिन भट्टराईको भान्सा घर भत्काउन लाग्दा छिमेकी भण्डारी धपाउन खोज्दा एक सय मिटरसम्म हात्तीले लखेटी लछार–पछार पारी मारेको थियो । घटनाको जानकारी पाएपछि इलाका प्रहरी कार्यालय दमकले अनुसन्धान थालेको छ ।

यसैबीच, शनिबार साँझ बिर्तामोड नगरपालिका–२ रामचोक स्थितमा ट्रकको ठक्करबाट स्कुटी चालकको मृत्यु भएको छ ।

पूर्वपश्चिम राजमार्गमा चारपानेबाट मुक्तिचौक तर्फ आउँदै गरेको मे १० प ६०१७ नं.को स्कुटीलाई सोही दिशातर्फ आउँदै गरेको ना ३ ख ४३६४ नम्बरको ट्रकले ठक्कर दिँदा स्कुटी चालक शिवसताक्षी नगरपालिका–७ की २२ वर्षीय रोजी कटुवालको मृत्यु भएको हो ।

स्कुटीमा पछाडी सवार शिवसताक्षी–७ की २८ वर्षीया सरिता राउत घाइते भएकी छन् । उनको अवस्था सामान्य रहेको छ भने स्कुटी, ट्रक र ट्रक चालक अर्जुनधारा नगरपालिका–९ का ५२ वर्षीय राजकुमार कार्कीलाई इलाका प्रहरी कार्यालय अनारमनीले नियन्त्रणमा लिएको छ ।

The post झापामा छुट्टाछुट्टै घटनामा चार जनाको मृत्यु appeared first on Jhapa Online.