रुसमा लामो दुरीका मिसाइलबाट हमला गर्न युक्रेनलाई अमेरिकाको अनुमति

काठमाडौं । अमेरिकाले पहिलो पटक युक्रेनलाई रुसभित्र आक्रमण गर्न लामो दुरीको मिसाइल प्रयोग गर्न अनुमति दिएको छ ।

बीबीसीको अमेरिकी सम्बद्ध संस्था सीबीएसका अनुसार हालको जो बाइडन प्रशासनले युक्रेनलाई रुसभित्र सीमित आक्रमणका लागि अमेरिकी सेनाको सामरिक मिसाइल प्रणाली प्रयोग गर्न सक्ने बताएको छ ।

आर्मी टेक्टिकल मिसाइल सिस्टम अमेरिकी रक्षा कम्पनीद्वारा निर्मित एक सुपरसोनिक ब्यालिस्टिक मिसाइल प्रणाली हो ।

अमेरिकी राष्ट्रपति बाइडनले डोनाल्ड ट्रम्पलाई सत्ता हस्तान्तरण गर्नुभन्दा दुई महिनाअघि नै ठूलो रुस-युक्रेन युद्ध निम्त्याउने डरले त्यस्ता आक्रमणहरूलाई अनुमति दिन अस्वीकार गरेका थिए ।

युक्रेनले एक वर्षभन्दा बढी समयदेखि युक्रेनभित्र रुसी कब्जामा रहेका लक्ष्यहरूमा आर्मी टेक्टिकल मिसाइल प्रणाली प्रयोग गर्दै आएको छ ।

युक्रेनले क्रिमियन प्रायद्वीपमा हवाई अड्डाहरू र जापोरिझियामा रूसी सैन्य आधारहरू आक्रमण गर्न सो प्रणाली प्रयोग गरेको छ । तर, अमेरिकाले अहिलेसम्म युक्रेनलाई रुसभित्र लामो दुरीका मिसाइलहरू प्रयोग गर्न अनुमति दिएको थिएन ।

लकहिड मार्टिन ब्यालिस्टिक मिसाइलहरू युक्रेनलाई प्रदान गरिएको सबैभन्दा शक्तिशाली मिसाइलमध्ये एक हो, जुन ३०० किलोमिटरको दायरामा प्रहार गर्न सक्षम छ ।

युक्रेनले रुसभित्र त्यस्ता हतियार प्रयोग गर्न नदिनु भनेको ‘आफ्नो पीठ पछाडि एउटा हात बाँधेर लड्न आग्रह गर्नु’ बराबर भएको तर्क गरेको थियो ।

अमेरिकी नीतिमा यो परिवर्तन कुर्स्क सीमा क्षेत्रमा रुसलाई मद्दत गर्न उत्तर कोरियाली सेनाको हालैको तैनाथीको प्रतिक्रियामा आएको बताइएको छ । कुर्स्क रुसको सिमानामा पर्छ र यहाँ युक्रेनले अगस्ट महिनादेखि करिब एक हजार वर्ग किलोमिटर क्षेत्र ओगटेको छ ।