मेसी भारत आउँदै

काठमाडौं । चर्चित फुटबलर लियोनल मेसीको विदेशमा मात्रै होइन, भारतमा पनि करोडौं फ्यान फलोइङ छन् । अब भारतीय फ्यानहरूले मेसीको झलक हेर्ने मौका पाउने भएका छन् ।

केरला राज्यका खेलकुदमन्त्री वी अब्दुरहिमानले मेसीसहित अर्जेन्टिनाको फुटबल टोली अर्को वर्ष अन्तर्राष्ट्रिय खेलका लागि आउने जानकारी दिएका छन् ।

उनले भने, ‘विश्वको नम्बर १ फुटबल टोली अर्जेन्टिना कप्तान लियोनल मेसीसँग केरला आउँदैछ । टोलीले दुई खेल खेल्नेछ ।’ अर्जेन्टिनाविरूद्धको प्रतिद्वन्द्वी को हुने र कहाँ खेल्ने भन्ने टुंगो लागेको छैन ।

तर, उनले कोच्ची रंगशालामा ५० हजारभन्दा बढी दर्शकको साथ खेल हुन सक्ने संकेत गरे । अर्जेन्टिना व्यवस्थापनसँग कुरा गर्न स्पेन गएको र केरलामा अर्जेन्टिनाको फ्यान देखेर विश्व च्याम्पियन टोली केरला आउन राजी भएको अब्दुराहिमान बताउँछन् ।

अर्जेन्टिना व्यवस्थापनका सदस्यहरू एक वा डेढ महिनाभित्र केरला आउनेछन्, त्यसपछि दुवै पक्षले आधिकारिक जानकारी दिनेछन् । मेसी पछिल्लो पटक सन् २०११ मा भारत आएका थिए ।