माओवादी केन्द्रका नेता तथा पूर्वमन्त्री राईको निधन

काठमाडौं । नेकपा माओवादी केन्द्रका नेता तथा पूर्वमन्त्री पदम राईको निधन भएको छ । पार्किन्सन रोगबाट ग्रसित राईको उपचारका क्रममा शनिबार वीर अस्पतालमा निधन भएको बताइएको छ ।

माओवादी केन्द्रका नेता सुनद किरातीले राईको अन्तिम संस्कार कहाँ र कहिले गर्ने भन्नेबारे निर्णय हुन बाँकी रहेको जानकारी दिए । उनी  भोजपुर षडानन्द नगरपालिका बोयाका स्थायी बासिन्दा हुन् ।

माओवादी केन्द्रका अध्यक्ष प्रचण्डले राईको निधनले दुखित बनाएको बताएका छन् । प्रचण्डले फेसबुकमा लेखेका छन्, ‘पारकिन्सन रोगबाट थलिनुभएका हाम्रो पार्टीका केन्द्रीय समिति सदस्य एवं पूर्वमन्त्री पदम राईको निधनले दुखित बनाएको छ । उहाँप्रति भावपूर्ण श्रद्धाञ्जली अर्पण गर्दै शोकाकुल परिवारजनमा गहिरो समवेदना व्यक्त गर्दछु ।’