बिर्तामोडको दुई स्थानमा आगलागी हुँदा २५ लाखको क्षति

बिर्तामोड, १० मंसिर । झापाका बिर्तामोड नगरपालिकाको वडा नं. ६ को दुई भिन्न स्थानमा आगलागी हुँदा करिब २५ लाख बराबरको क्षति भएको छ ।

बिर्तामोड–६ बुट्टाबारीमा मोटरसाइकल वर्कसप र सोही वडाको मसाले टोलमा टिपरमा आगलागी हुँदा रू २५ लाख बराबरको क्षति भएको जिल्ला प्रहरी कार्यालय झापाले जनाएको छ ।

गएराति १ः४० बजे बिर्तामोड–६ मसाले टोलस्थित अर्जुन थलानको परालको थुप्रोमा अचानक आगलागी हुँदा नजिकै रहेको पञ्चसेवा ग्यारेजमा मर्मत गर्न राखिएको सक्षम निर्माण सेवाको बा.०३–००१ क ०३३१ नम्बरको टिपरमा आगलागी भएको छ ।

आगलागीबाट उक्त टिफरको अगाडीको भाग जलेर नष्ट हुँदा करिब रू १० लाख बराबरको क्षति भएको जिल्ला प्रहरी कार्यालय झापाका प्रवक्ता प्रहरी नायब उपरीक्षक कृष्णकुमार चन्दले जानकारी दिनुभयो ।

आगो इलाका प्रहरी कार्यालय अनारमनी र अस्थायी प्रहरी चौकी बुट्टाबारीबाट खटिएको प्रहरी टोली र स्थानीयबासीले २ः३० बजे पूर्ण रुपमा नियन्त्रण लिएका थिए । घटनाको सम्बन्धमा थप अनुसन्धान भइरहेको प्रहरीले जनाएको छ ।

त्यस्तै, बिर्तामोड नगरपालिका–६ स्थित बुट्टाबारीमा आइतबार साँझ मोटरसाइकल वर्कसपमा आगलागी हुँदा रू १५ लाख बराबरको क्षति भएको छ । अर्जुनधारा नगरपालिका–११ का दीपक राजवंशीले बिर्तामोड–६ बुट्टावारी चोकका आशिष वनको घरको सटर भाडामा लिएर मोटरसाइकल वर्कसपमा विद्युत् चुहिएर आगलागी हुँदा उक्त क्षति भएको जिल्ला प्रहरी कार्यालय झापाका प्रवक्ता प्रहरी नायब उपरीक्षक कृष्णकुमार चन्दले जानकारी दिनुभयो ।

आगलागीबाट वर्कसपमा मर्मतका लागि राखिएको स्कुटर एक थान, सुपर स्पेलेण्डर मोटरसाइकल एक थान, एयर कम्प्रेसर एक थान, मर्मतमा प्रयोग हुने विभिन्न औजार र उक्त कोठामा समेत क्षति करिब १५ लाख बराबरको क्षति भएको हो ।

आगलागी प्रहरी, स्थानीयबासी र बिर्तामोड नगरपालिका, भद्रपुर नगरपालिका र मेचीनगर नगरपालिकाको बारुण यन्त्रले नियन्त्रणमा लिएको थियो ।

The post बिर्तामोडको दुई स्थानमा आगलागी हुँदा २५ लाखको क्षति appeared first on Jhapa Online.