खानलाई रिहा गर्न माग गर्दै डी चोकतर्फ अघि बढे पीटीआई समर्थक

काठमाडौं । पाकिस्तानका पूर्वप्रधानमन्त्री इमरान खानको रिहाइ माग गर्दै  पीटीआई समर्थकहरू डी–चोकतर्फ लागेका छन् ।

मंगलबार बिहान सुरक्षाफौजहरू पीटीआई समर्थकहरूसँग झडपका लागि तयारी गर्दै गर्दा डी–चोकमा स्थिति तनावपूर्ण देखिएको हो । समर्थकहरू आफ्नो गन्तव्यभन्दा अहिले १० किलोमिटरभित्र रहेको अलजजिराले जनाएको छ ।

इस्लामावादको सरकारी भवनहरूको अगाडिको सार्वजनिक चोक डी–चोक हो । त्यहाँ पीटीआईका समर्थकहरुले भेला हुने योजना बनाएका थिए ।

प्यारामिलिटरी फोर्स रेंजर्सलाई पहिलो प्रतिरक्षा लाइनका रूपमा तैनाथ गरिएको छ, जबकी प्रहरीहरू दंगा नियन्त्रण सामग्रीसहित तयारी गर्दै छन् । प्रदर्शनकारीलाई रोक्नका लागि अधिकारीले पानीको तोपसमेत तैनाथ गरेका छन् ।

गृहमन्त्री मोहसिन नकवीले सोमबार राति पत्रकार सम्मेलनमा चेतावनी दिँदै रेड जोनमा प्रवेश गर्ने प्रदर्शनकारीलाई पक्राउ गरिने र कारबाही गरिने बताएका थिए ।