कनकाई–६ मा राजनीति दलमाथि स्वतन्त्रको पल्ला भारी, लक्ष्मीप्रसाद ओली निर्वाचित

सन्तोष शर्मा
बनियानी, १७ मंसिर । झापाको कनकाई नगरपालिका–६ को वडाध्यक्ष पदमा स्वतन्त्र उम्मेद्वार लक्ष्मीप्रसाद ओली निर्वाचित हुनुभएको छ ।

आज भएको उपनिर्वाचनमा चापालक चुनाव चिह्न लिएर उठ्नुभएका ५५ वर्षीय स्वतन्त्र उम्मेदवार ओली चार सय ९३ मतका साथ निर्वाचित हुनुभएको मुख्य निर्वाचन अधिकृत उमेशप्रसाद लुइँटेलले जानकारी दिनुभयो । उहाँका निकतम् प्रतिद्वन्द्वी नेकपा एमालेका ५७ वर्षीय तुलराम बस्नेतले तीन सय ५६ मत प्राप्त गर्नुभएको छ ।

हालै सार्वजनिक मत परिणाम अनुसार नेपाली कांग्रेसका ४५ वर्षीय राम गोपाल ओलीले तीन सय १७ मत, नेकपा (माओवादी केन्द्र)का ४९ वर्षीय गणेशबहादुर थापाले दुई सय ७७ मत र राष्ट्रिय प्रजातन्त्र पार्टीका ५९ वर्षीय नारायणप्रसाद निरौलाले २६ प्राप्त गर्नुभएको छ ।

यसैगरी, मंगोल नेशनल अर्गनाजेशनका ४९ वर्षीय पदनबहादुर तामाङले २० मत, जनमत पार्टीका ६९ वर्षीय शुकलाल राजवंशीले नौ मत, नागरिक उन्मुक्ति पार्टीकी २४ वर्षीया जनमुना राजवंशीले छ र संघीय लोकतान्त्रिक राष्ट्रिय मञ्चका ३७ वर्षीय दलबहादुर श्रेष्ठले दुई मत प्राप्त गर्नुभएको मुख्य निर्वाचन अधिकृत लुइँटेलले जानकारी दिनुभयो ।

कनकाई–६ का वडाध्यक्ष दीर्घबहादुर थापाको निधन भएपछि आज भएको उपनिर्वाचनमा ७१.५१ प्रतिशत अर्थात एक हजार पाँच सय १३ मत खसेको थियो । यहाँ एक हजार ५८ जना महिला र एक हजार जना पुरुष गरी कूल दुई हजार ५८ जना मतदाता रहेका छन् ।

कनकाई–६ मा गत २०७९ को स्थानीय तहको निर्वाचनमा एमाले दीर्घबहादुर थापाले पाँच सय आठ मत ल्याएर विजयी हुनुभएको थियो भने स्वतन्त्र उम्मेदवार ओलीले चार सय चार मत ल्याएर उपविजेता बन्नुभएको थियो ।

The post कनकाई–६ मा राजनीति दलमाथि स्वतन्त्रको पल्ला भारी, लक्ष्मीप्रसाद ओली निर्वाचित appeared first on Jhapa Online.