बाबुराम भट्टराईसँग रवि लामिछानेको गुनासो- राज्यले प्रतिसोध साँध्यो !

पोखरा । नेपाल समाजवादी पार्टी (नयाँ शक्ति) का अध्यक्ष बाबुराम भट्टराईसँग कास्की प्रहरीको हिरासतमा रहेका राष्ट्रिय स्वतन्त्र पार्टी (रास्वपा) का सभापति रवि लामिछानेले राज्यले अन्याय गरेको भन्दै गुनासो गरेका छन् ।

शुक्रबार बिहान कास्की पुगेका भट्टराईसँगको भेटमा लामिछानेले आफूले अनुसन्धानमा सहयोग गर्ने बताउँदा पनि प्रतिसोध साँधेको आरोप लगाए ।

भेटपछि पत्रकारहरूसँगको कुराकानीमा भट्टराईले लामिछानेमाथि एकपछि अर्को गरेर दुःख दिने काम अस्वाभाविक र अन्यायपूर्ण रहेकाले ऐक्यबद्धता जनाउन आएको बताए ।

उनले पचासौँ लाख साना बचतकर्ताहरूको समस्या हल गर्नतिर सरकार नलागेको पनि आरोप लगाए ।

आफूसँगको भेटमा लामिछानेले पनि राज्यले प्रतिशोध साधेको बताएको भट्टराईले सुनाए । यद्यपि राज्यलाई सहयोग गरेको र आगामी दिनमा पनि गर्ने बताएको भट्टराईको भनाइ छ ।