बेरुजु शून्यमा झार्नेगरि काम गर्न लुम्बिनीका मुख्यमन्त्री आचार्यको निर्देशन

बुटवल। 

लुम्बिनी प्रदेशका मुख्यमन्त्री चेतनारायण आचार्यले आर्थिक अनुशासन कायम गर्न प्रदेश सरकारले बेरुजु शून्यमा झानेगरि काम गर्ने बताएका छन् । महालेखापरीक्षकको कार्यालयले मुख्यमन्त्री तथा मन्त्रिपरिषद् कार्यालयको समन्वयमा सोमवार राप्ती उपत्यका देउखुरीमा आयोजना गरेको लेखापरीक्षण, बेरुजु फछ्र्यौट र सम्परीक्षण सम्वन्धि प्रदेशस्तरीय अन्तरक्रिया तथा छलफल कार्यक्रमलाई सम्बोधन गर्दै मुख्यमन्त्री आचार्यले बेरुजु फछ्र्याैटलाई प्राथमिकतामा राखेर काम गर्न मातहतका निकायलाई निर्देशन दिए ।‘सुरुका दिनमा बेरुजु थिएन । विचमा बेरुजु बढेर गयो । त्यसलाई घटाउन जरुरी छ’उनले भने,‘सुशासन र जबाफदेहिता कायम गर्न बेरुजुलाई शून्यमा झार्ने सरकारले रणनीति बनाएको छ ।’ 

बेरुजु घटाउन कर्मचारीको कार्यसम्पादन मूल्याङ्कनमा बेरुजु फर्छाैटलाई अनिवार्य समेटनुपर्ने मुख्यमन्त्री आचार्यले बताए ।‘कर्मचारीको कार्यसम्पादन मूल्याङ्कनको एउटा आधार बेरुजु फछ्र्यौलाई बनाउनुपर्छ’उनले भने,‘अनि कर्मचारी तहबाट यसलाई चासोको रुपमा लिने हुन्छ ।’

प्रदेश सरकारले बेरुजुलाई घटाउने बिषय रणनीतिक योजनाहरुमा समेटेर अघि बढाएको, कर्मचारी तहमा जारी गरेको १४ बुँदे निर्देशनले समेत सम्बोधन गरेकाले आगामी दिनमा सुधार हुने विश्वास व्यक्त गरे । प्रदेश तहमा जनशक्तिको अभावलाई समाधान गर्नेगरी लोकसेवा आयोगले कर्मचारी छनोट, बढुवाको कामलाई अघि बढाएकाले कार्यसम्पादन सहज रुपमा हुनेमा जोड दिए । संघीय सरकारले समानिकरणको अनुदान रकम प्रदेशमा नपठाउँदा दुई अर्ब बढीको भुक्तानीको भार प्रदेशमा थपिएको मुख्यमन्त्री आचार्यले बताए ।

महालेखा परीक्षक तोयम रायाले सुशासन कायम गर्ने भूमिकालाई प्रभावकारी बनाउन बेरुजु फछ्र्याैटलाई प्राथमिकतामा राख्नुपर्ने बताए ।