झापाको अर्जुनधारामा डुबेर दुई बालकको मृत्यु

झापा, २४ जेठ । झापाको अर्जुनधारा नगरपालिका–११ स्थित पोखरीमा डुबेर आज बिहान दुई जना बालकको आज मृत्यु भएको छ ।

अर्जुनधारा–११ स्थित नमुना सामुदायिक वनभित्र रहेको सामुदायिक दिमदिमे पोखरीमा डुबेर तेह्रथुम जिरीखिम्तीका १० वर्षीय बालक महसुस गुरुङ र अर्जुनधारा–११ का सुजल गुरुङको मृत्यु भएको जिल्ला प्रहरी कार्यालय झापाका प्रवक्ता प्रहरी नायब उपरीक्षक खड्गबहादुर खड्काले जानकारी दिनुभयो ।

अर्जुनधारा–११ का पूर्णबहादुर राईको घरमा पाहुना आएकी तेह्रथुम जिरीखिम्ती धनमाया गुरुङका महसुस र अर्जुनधारा–११ मुना गुरुङका छोरा सुजल पौडी खेल्ने क्रममा पोखरीमा डुबिरहेको अवस्थामा स्थानीयबासीले देखेर उद्धार गरेका थिए । उनीहरुलाई उपचारका लागि बीएण्डसी अस्पताल बिर्तामोड पुर्याइएकोमा अस्पतालका चिकित्सकले उनीहरु दुबै जनालाई मृत घोषित गरेको जिल्ला प्रहरी कार्यालय झापाले जनाएको छ ।

घटनाका सम्बन्धमा थप अनुसन्धान भइरहेको प्रहरीले जनाएको छ ।

The post झापाको अर्जुनधारामा डुबेर दुई बालकको मृत्यु appeared first on Jhapa Online.