पहिलो जितको खोजीमा रहेको नेपाल स्कटल्यान्डविरुद्ध भिड्दै

काठमाडौं । आईसीसी यू–१९ महिला टी–२० विश्वकप २०२५ को आफ्नो दोस्रो खेलमा नेपालले आज (सोमबार) स्कटल्यान्डविरुद्ध भिड्दैछ ।

मलेसियाको बाङ्गीस्थित यूकेएम क्रिकेट ओभलमा नेपाली समयअनुसार दिउँसो सवा १२ बजेदेखि सुरू हुने खेलमा नेपाल पहिलो जितको खोजीमा हुनेछ ।

यसअघि आइतबार भएको पहिलो खेलमा नेपाल बङ्गलादेशसँग ५ विकेटले पराजित भएको थियो ।

यसर्थ पूजा महतोको कप्तानीमा रहेको नेपाल आज स्कटल्यान्डलाई हराएर अर्को चरण (सुपर– सिक्स)मा जाने सम्भावनालाई कायमै राख्न चाहन्छ ।

नेपालले महिला क्रिकेटमा स्कटल्यान्डसँग खेल्न लागेको यो पहिलोपटक हो । यसअघि पनि विश्वकप खेलिसकेको स्कटल्यान्ड छनोटबाट आएको टिम हो । त्यसकारण नेपाल र स्कटल्यान्डको स्तर एउटै छ ।

यस्तै प्रतियोगिताअन्तर्गत आज अन्य ५ खेल पनि भइरहेका छन् ।

आजका अन्य खेल :

अमेरिका भर्सेस आयरल्यान्ड विहान ८ः१५
अस्ट्रेलिया भर्सेस बंगलादेश बिहान ८ः१५
न्युजील्यान्ड भर्सेस नाइजेरिया बिहान ८ः१५
पाकिस्तान इंग्ल्यान्ड दिउँसो १२ः१५
दक्षिण अफ्रिका भर्सेस सामोआ दिउँसो १२ः१५ ।