क्रोएसिया पठाइदिन्छु भन्दै रकम ठगी गर्ने महिला पक्राउ

काठमाडौँ । वैदेशिक रोजगारीको लागि क्रोएसिया पठाइदिन्छु भनी रकम ठगी गर्ने व्यक्ति पक्राउ परेकी छिन् । पक्राउ पर्नेमा जिल्ला काभ्रेपलाञ्चोक महाभारत गाँउपालिका वडा नं २ घर भई काठमाडौँ महानगरपालिका वडा नं ६ बस्ने ४० वर्षीया लालिमाया दर्लामी रहेकी छिन् ।

उनले बेरोजगार युवायुवतीहरुलाई आकर्षक तलबको प्रलोभनमा पारी क्रोएसिया लैजाने भन्दै पाँच लाख ७५ हजार रुपैयाँ ठगी गरेकी थिइन् ।

लामो समयसम्म झुक्यानमा राखि विदेश नपठाई सम्पर्क विहीन भएकोमा पीडितले दिएको जाहेरी दरखास्त उपर अनुसन्धान हुँदा प्रहरीले दर्लामीलाई काठमाडौँ महानगरपालिका वडा नं ९ बाट पक्राउ गरेको हो ।

उनलाई थप अनुसन्धान तथा कारवाहीको लागि वैदेशिक रोजगार विभाग ताहाचल, काठमाडौँ पठाइएको प्रहरीले जनाएको छ ।