अखिल क्रान्तिकारीमा मसी विवाद : रातोलाई मात्रै मान्यता दिन अध्यक्षका तीन उम्मेदवारको माग

काठमाडौं । माओवादी केन्द्रको विद्यार्थी सङ्गठन अखिल क्रान्तिकारीका अध्यक्षका तीन उम्मेदवारले रातो मसीले रेजा लगाएको मतपत्रलाई मात्रै मान्यता दिनुपर्ने माग राखेका छन् ।

उम्मेदवारत्रय हेमन्त राई, उपदेश यादव र सुदिन पौडेलले यस्तो माग राखेका हुन् ।

रेजाका लागि निर्वाचन समितिले व्यवस्था गरेको ‘रातो मसी कलम’ द्वारा रेजा लगाइएको मतपत्र मात्रै गणना गर्नुपर्ने उनीहरुको माग छ । अन्य रङ्ग भेटिए मत बदर हुने व्यवस्था गर्नुपर्ने उनीहरुको मागपत्रमा उल्लेख छ ।

पार्टी अध्यक्ष पुष्पकमल दाहाल ‘प्रचण्ड’ पक्षधरका उम्मेदवार विजय सापकोटा भने कालो मसीलाई पनि सदर गर्ने पक्षमा छन् ।

विश्वविद्यालय प्रदेश र उपत्यका विशेष प्रदेशको मतगणनामा यसअघि मतपत्रमा कालो र रातो रङ्ग प्रयोग भएको भन्दै विवाद भएपछि गणना रोकिएको थियो ।