च्याम्पियन्स ट्रफी : भारत र अष्ट्रेलियाको दबदबा, यस्तो छ विगतको रेकर्ड

काठमाडौं । च्याम्पियन्स ट्रफी यही बुधबार अर्थात १९ फेब्रुअरीदेखि सुरु हुँदैछ ।

आयोजक पाकिस्तानसहित विश्वको शीर्ष ८ स्थानमा रहेका एकदिवसीय टोलीले प्रतियोगितामा भाग लिनेछन्, तर तीमध्ये सबैभन्दा बलियो टोली कुन हो ?

कसले धेरै उपाधि जितेको छ ? कुन देशले धेरै खेल जितेको छ  ? स्कोरिङ कसको बढी छ ? धेरै विकेट लिने खेलाडी को हो ? शीर्ष ५ मा कोको ब्याट्सम्यान छन् ? शीर्ष ५ मा कुन-कुन बलर पर्दछन् ? लगायतका विषयमा जानकारी दिनेछौँ ।

अष्ट्रेलिया र भारत २-२ पटक च्याम्पियन

भारत र अष्ट्रेलियाले सबैभन्दा धेरै अर्थात् २-२ पटक च्याम्पियन्स ट्रफी उपाधि जितेका छन् ।

भारतीय टोलीले सन् २०१३ मा एमएस धोनीको कप्तानीमा इङ्गल्याण्डलाई ५ रनले हराएर दोस्रो पटक उपाधि जितेको थियो । यसअघि टोली सन् २००२ मा सौरभ गांगुलीको कप्तानीमा श्रीलङ्कासँग संयुक्त विजेता बनेको थियो ।

रिकी पोन्टिङको कप्तानीमा अस्ट्रेलियाले सन्  २००६ र २००९ मा लगातार दुई उपाधि जितेको थियो । अष्ट्रेलियाली टोली सन् २००६ मा वेस्ट इन्डिजलाई ८ विकेटले हराएर पहिलो पटक च्याम्पियन बनेको थियो । त्यसपछि सन् २००९ मा न्युजिल्याण्डलाई ६ विकेटले पराजित गर्‍यो । दुवै पटक शेन वाटसन प्लेयर अफ द फाइनल चुनिएका थिए ।

साथै, अहिलेको आयोजक पाकिस्तान, श्रीलङ्का, वेस्ट इन्डिज, दक्षिण अफ्रिका र न्युजिल्याण्डले एक-एक पटक उपाधि जितेका छन् । इङ्ल्याण्डले सन् २०१३ र २००४ मा दुई फाइनल खेल्यो, तर च्याम्पियन बन्न सकेन ।

धेरै खेल जित्ने टोली – भारत

सबैभन्दा धेरै खेल जित्ने हिसाबले भारतीय टोली शीर्ष स्थानमा छ । यसले प्रतियोगितामा सबैभन्दा धेरै २९ खेल खेलेको छ भने तीमध्ये १८ खेल जित्यो । भारतले ६२ प्रतिशत खेल जित्यो । इङ्गल्याण्ड (५६ प्रतिशत), वेस्ट इन्डिज (५४ प्रतिशत) र श्रीलङ्का (५२ प्रतिशत)ले आधाभन्दा बढी खेल जितेको छ ।

अष्ट्रेलिया (५० प्रतिशत), दक्षिण अफ्रिका (५० प्रतिशत) र न्युजिल्याण्ड(५० प्रतिशत)का विश्व विजेता टोलीले आधा खेल मात्र जित्न सकेका छन् । पाकिस्तान र बङ्गलादेशको जित प्रतिशत ५० भन्दा कम छ । जिम्बाब्वेले सबै खेल हारेको छ।

धेरै रन बनाउने टोली

च्याम्पियन्स ट्रफीमा अहिलेसम्म ४ टोलीले ५ हजारभन्दा बढी रन बनाएका छन्, जसमध्ये भारत शीर्ष स्थानमा छ । टोलीले ५ हजार ८१५ रन बनाएको छ ।

भारतीय खेलाडीले १० शतक र ३५ अर्धशतक बनाएका छन् । भारतीय ब्याट्सम्यानले ६०१ चौका र ६४ छक्का प्रहार गरेका छन् ।

भारतीय टोलीबाहेक इङ्गल्याण्ड (५५५५ रन), श्रीलङ्का (५४५२ रन) र दक्षिण अफ्रिका (५१७५ रन) का टोलीहरूले ५००० भन्दा बढी रन बनाउन सफल भएका छन् ।

न्युजिल्याण्ड, अष्ट्रेलिया, वेस्ट इन्डिज र पाकिस्तानले ४ हजारभन्दा बढी रन बनाएका छन् ।

धेरै विकेट लिने देश

प्रतियोगितामा सबैभन्दा धेरै विकेट लिने हिसाबले पनि भारत नम्बर १ मा छ । जबकी श्रीलङ्का दोस्रो र न्युजिल्याण्ड तेस्रो स्थानमा छ । भारतीय टोलीले १९५ विकेट लिएको छ । जबकी श्रीलङ्काको १७५ विकेट छ र न्युजिल्याण्डको नाममा १७२ विकेट छ ।

क्षमताको कुरा गर्दा भारतीय बलरले प्रतियोगिताको प्रत्येक ४१औं बलमा विकेट लिएका छन् ।

दक्षिण अफ्रिका र न्युजिल्याण्डका बलरले प्रत्येक ३५औं बलमा एक विकेट लिन्छन् । श्रीलङ्काली बलरले प्रत्येक ३९औं बलमा विकेट लिएको देखिन्छ ।

धेरै रन बनाउने ५ ब्याट्सम्यान

च्याम्पियन्स ट्रफीको शीर्ष ५ स्कोरको रेकर्डमा भारतीय र श्रीलङ्काली २-२ ब्याट्सम्यानको नाम समावेश छ । एक जना ब्याट्सम्यान वेस्ट इन्डिजका छन् ।

यो रेकर्डमा अष्ट्रेलिया, इङ्गल्याण्ड, पाकिस्तान, दक्षिण अफ्रिका र न्यूजील्याण्डका कुनै पनि ब्याट्सम्यान समावेश छैनन् ।

च्याम्पियन्स ट्रफीमा वेस्ट इन्डिजका क्रिस गेल सर्वाधिक रन बनाउने खेलाडी हुन् । उनले ७९१ रन बनाएका छन् । ७४२ रनसहित दोस्रो स्थानमा श्रीलङ्काली ब्याटर माहेला जयवर्धने छन् ।

भारतका शिखर धवन ७१० रनका साथ तेस्रो स्थानमा छन् भने पूर्वकप्तान सौरभ गांगुली ६६५ रनका साथ पाँचौं स्थानमा छन् ।

धेरै विकेट लिने ५ खेलाडी

च्याम्पियन्स ट्रफीमा सबैभन्दा धेरै विकेट लिने खेलाडी न्युजिल्याण्डका काइल मिल्स हुन् । उनले १५ खेलमा २८ विकेट लिएका छन् ।

श्रीलङ्काका लसिथ मालिङ्गा २५ विकेटसहित दोस्रो र मुथैया मुरलीथरन २४ विकेटसहित तेस्रो स्थानमा छन् । ब्रेट लीले २२ र जिमी एन्डरसनले २१ विकेट लिएका छन् ।

माथिको विवरण हेर्ने हो भने च्याम्पियन्स ट्रफीमा भारत सबैभन्दा बलियो टोली हो । समग्रमा टोलीले अष्ट्रेलियाको बराबर २ उपाधि जितेको छ, तर खेल जित, स्कोरिङ दर र विकेट लिने क्षमताको हिसाबले भारतीय टोलीले कङ्गारुलाई उछिनेको छ ।

भारतले च्याम्पियन्स ट्रफीमा सबैभन्दा धेरै खेल जितेको छ, सबैभन्दा धेरै रन बनाएको छ र सबैभन्दा धेरै विकेट लिएको छ ।

यति मात्र होइन, शीर्ष ५ ब्याट्सम्यानमा भारतका २ खेलाडी छन् भने अष्ट्रेलियाका कुनै पनि ब्याट्सम्यान छैनन् । तर, शीर्ष ५ विकेट लिने खेलाडीहरूमा कुनै पनि भारतीय बलर छैनन् । यद्यपी अष्ट्रेलियाका ब्रेट ली यस रेकर्डमा समावेश छन् ।

च्याम्पियन्स ट्रफीका ‘प्लेयर्स टू वाच’ : बाबरदेखि शुभमनसम्म