राजधानी दैनिकले किन पाँच गुणा बढायो पत्रिकाको मूल्य ?

काठमाडौं । राजधानी राष्ट्रिय दैनिकले पत्रिकाको मूल्यको ह्वात्तै बढाएको छ ।

राजधानी न्युज पब्लिकेशन प्रालिले पत्रिकाको मूल्य एकैचोटी पाँच गुणा बढाएको हो । यसअघि १० रुपैयाँमा पत्रिका बिक्री गर्दै आएको राजधानी न्युज पब्लिकेशन प्रालिले अब बढाएर ५० रुपैयाँ पुर्‍याएको छ ।

पब्लिकेशनले पत्रिकाको मूल्य बढाउनुको कारणसमेत खुलाएको छ । आर्थिक मन्दी, महङ्गी तथा विज्ञापन बजार खस्कँदै जानु, पत्रिका छपाईका लागि आवश्यक सामग्रीको मूल्यवृद्धि लगायतका कारणले मूल्य बढाउन बाध्य भएको पत्रिकाको प्रकाशकीयमा उल्लेख छ ।

मूल्य समायोजनले पाठक वर्गलाई केही असुविधा भएपनि निडर भई सत्यतथ्यमा आधारित रहेर अरूभन्दा भिन्दै समाचार प्रेषित गरी पाठकको सुसूचित हुने अधिकारको ग्यारेण्टी गर्ने पत्रिकाले दाबी गरेको छ।