फिलिपिन्सका पूर्वराष्ट्रपति रोड्रिगो डुटेर्टे पक्राउ

काठमाडौं । प्रहरीले फिलिपिन्सका पूर्व राष्ट्रपति रोड्रिगो डुटेर्टेलाई पक्राउ गरेको छ ।

अन्तर्राष्ट्रिय फौजदारी अदालत (आईसीसी) ले मानवता विरुद्धको अपराधको आरोप लगाउँदै उनीविरुद्ध पक्राउ वारेन्ट जारी गरेको थियो ।

हङकङबाट फर्किएपछि फिलिपिन्सको राजधानी मनिला विमानस्थलमा प्रहरीले डुटेर्टेलाई पक्राउ गरेको बीबीसीले उल्लेख गरेको छ ।

सन् २०१६ देखि २०२२ सम्म दक्षिणपूर्वी एसियाली राष्ट्रको राष्ट्रपति रहँदा डुटेर्टेले लागुऔषध विरोधी कारबाहीको नेतृत्व गरेका थिए, जसमा हजारौंको मृत्यु भएको थियो ।

यसअघि आफ्नो सम्भावित गिरफ्तारीको बारेमा उनले आफू जेल जान तयार रहेको बताएका थिए ।

फिलिपिन्समा मानव अधिकारका लागि अन्तर्राष्ट्रिय गठबन्धनले गिरफ्तारीलाई “ऐतिहासिक क्षण” भनेको छ ।