झापाको मेचीनगरबाट तामाको तार चोरी गर्ने दुई भारतीय युवा पक्राउ

झापा, ९ जेठ । झापाको मेचीनगर नगरपालिकामा टेलिकमको तामाको तार चोरीमा संलग्न दुई जना भारतीय युवालाई प्रहरीले पक्राउ गरेको छ ।

पक्राउ पर्नेमा भारत दार्जिलिङ पानिटयाङकीका २७ वर्षीय तापच बरमन र सोही स्थानका २२ वर्षीय अमित सरकार रहेको जिल्ला प्रहरी कार्यालय झापाका प्रवक्ता प्रहरी नायब उपरीक्षक खगेन्द्र खड्काले जानकारी दिनुभयो ।

मेचीनगर–७, ५ नम्बर पोष्टमा रहेको चिया बगानमा प्रहरी चौकी सतिघट्टाबाट डिउटीमा खटिएको प्रहरी टोलीले चेकजाँच गर्ने क्रममा उनीहरुमाथि शंका लागेर चेकजाँच गर्दा चार मुठा तामाको तार फेला पारेको प्रवक्ता खड्काले बताउनुभयो ।

तौल गर्दा एक सय केजी रहेको तारको मूल्य करिब रू ८० हजार पर्ने जनाइएको छ । उनीहरुले मेचीनगर–१३ स्थित चारआली आसपासबाट तार चोरी गरेको स्वीकार गरेका छन् ।

नेपाल टेलिकम धुलाबारी शाखाले समेत बिजुलीको पोलमा जडान गरिएको कपर नेटवर्कको तार चोरी भएको निवेदन दिएको जिल्ला प्रहरी कार्यालयले जनाएको छ । पाँच दिन म्याद थप गरी पक्राउ परेकाहरुमाथि अनुसन्धान भइरहेको प्रहरीले जनाएको छ ।

The post झापाको मेचीनगरबाट तामाको तार चोरी गर्ने दुई भारतीय युवा पक्राउ appeared first on Jhapa Online.