५४ लाख बराबरको सामान राजश्व कार्यालय पथलैयामा बुझाइयो

काठमाडौं । बारा प्रहरीले ५४ लाख ३५ हजार बराबरको सामान राजश्व अनुसन्धान कार्यालय पथलैयामा बुझाएको छ ।

इलाका प्रहरी कार्यालय जीतपुरबाट खटिएको गस्ती टोलीले शुक्रबार बिहान ना ५ ख ६७४७ नम्बरको ट्रकलाई चेकजाँच गर्दा अवैध सामान बरामद गरेको हो ।

प्रहरी सहायक निरीक्षक राजन शिवाकोटीका अनुसार जीतपुर सिमरा उपमहानगरपालिका वडा नं.७ जीतपुरस्थित कार्यालय अगाडि चेक पोवाईन्टमा ट्रकलाई रोकी चेकजाँच गर्दा बिल बिजकभन्दा बढी सामान रहेको पाइएको छ । वीरगञ्जबाट रुपन्देही जाँदै गरेको उक्त सामानको स्रोत खुलाउन नसकेकाले बरामद गरिएको उनको भनाइ छ ।

उक्त ट्रकमा ५४ लाख ३५ हजार २ सय ७८ रूपैयाँ बराबरको कपडा, लङ, धागो, चप्पललगायत अन्य खुद्रा सामानहरु रहेको शिवाकोटीले जानकारी दिए ।

सामानसहित नियन्त्रणमा लिइएको ट्रकलाई आवश्यक कारबाहीको लागि राजश्व अनुसन्धान कार्यालय पथलैयामा बुझाइएको बारा प्रहरीले जनाएको छ ।