अनुगमनमा गएका वडाध्यक्षमाथि चक्कु प्रहार

मुगु । जुम्लाको तिला गाउँपालिकाका वडा नम्बर ४ का वडाध्यक्ष ललितबहादुर शाहीमाथि चक्कु प्रहार भएको छ । आफ्नै वडामा अनुगमन गरेर फर्केने बेला सामूहिक आक्रमण गरी उनीमाथि चक्कु प्रहार गरिएको हो ।

चक्कु प्रहारबाट घाइते भएका ४२ वर्षीय वडाध्यक्ष शाहीको कर्णाली स्वास्थ्य बिज्ञान प्रतिष्ठानमा उपचार भइरहेको प्रहरी निरीक्षक असिम हमालले बताए । उनले भने, ‘पीडितले तीन जनाको नाम दिनु भएको छ ।’

तीनमध्ये एक जनालाई जुम्ला बसपार्कबाट पक्राउ गरिएको हो । अन्य व्यक्तिलाई खोजी कार्य भइरहेको छ । घटनाका आरोपित २० देखि २५ वर्ष उमेर समूहका छन् । प्रहरीले घटना आरोपितको नाम भने सार्वजनिक गरेको छैन ।

त्यस्तैगरी सोही गाउँपालिका–३ का वडाअध्यक्ष ३८ वर्षीय धनबहादुर शाहीमाथि पनि ढुङ्गा प्रहार भएको प्रहरीले जनाएको छ ।

वडाध्यक्ष धनबहादुरले भने, ‘ममाथि ढुङगा मुक्का प्रहार भएको हो । तर मेरो टाउकोमा हेल्मेट भएकाले त्यति चोटपटक लागेन । वडा नम्बर ४ का वडाध्यक्षलाई हतियार (चक्कु) नै प्रहार भएकोले बढी चोट लागेको छ । अहिले हामी अस्पतालमै उपचारमा छौँ ।’