विश्वकप विजेता दुई खेलाडीले गोल गरेपछि इन्टर र मोन्टेरीले बराबरी खेले

क्यालिफोर्निया । अमेरिकामा जारी क्लब विश्वकप फुटबलमा इटालियन क्लब इन्टर मिलान मेक्सिकन क्लब मोन्टेरीसँग १–१ गोलको बराबरीमा रोकिएको छ । च्याम्पियन्स लिग फाइनलमा हार व्यहोरेपछि पहिलोपटक मैदान उत्रेको इन्टरका लागि यो क्लब विश्वकपमा निराशाजनक सुरुवात रह्यो ।

मोन्टेरीका लागि अनुभवी स्पेनिस डिफेन्डर सर्जियो रामोसले पहिलो हाफको २५ औँ मिनेटमै शानदार हेड गोल गर्दै टिमलाई अग्रता दिलाए । उक्त गोलले बुधबार बिहान दक्षिण क्यालिफोर्नियामा रहेका प्रो–मेक्सिको समर्थकलाई झन् उत्साहित बनायो । यो खेल मोन्टेरीका प्रशिक्षक डोमेनक टोरेन्टको डेब्यू पनि थियो ।

इन्टरका कप्तान लुटारो मार्टिनेजले खेलको ४२औँ मिनेटमा कार्लोस अगस्टोको उत्कृष्ट पासमा ट्याप–इन गोल गर्दै बराबरी गोल फर्काए । तर त्यसपछि निरन्तर बल पोजेसन (६२ प्रतिशत)मा रहे पनि इन्टरले निर्णायक गोल गर्न सकेन । मोन्टेरीले भने खेलभरि जम्मा एकपल्ट मात्र पोष्टमा सट हानेको थियो ।

इन्टरका नयाँ प्रशिक्षक क्रिस्टियन चिभुको पनि यो डेब्यू खेल थियो । उनी क्लबका पूर्वडिफेन्डरसमेत हुन् र क्लबले सिमोने इन्जागीको स्थानमा उनलाई ल्याएको हो । चिभुले च्याम्पियन्स लिग फाइनल खेलेका ११ मध्ये ७ खेलाडीलाई मात्र सुरुवाती रोजाइमा राखेका थिए ।

खेलको ६८औँ मिनेटमा अर्जेन्टाइन स्ट्राइकर मार्टिनेजले दोस्रो पटक बलले जाली चुमाएका थिए । तर अफसाइडका कारण त्यो रद्द गरियो । अन्तिम मिनेटमा दुवै टिमले गोल गर्ने राम्रो मौका गुमाए । अन्त्यतिर मार्टिनेजले पहेँलो कार्डसमेत पाए ।

इन्टरका युवा स्ट्राइकर सेबास्टियानो एस्पोसिटो तीन वर्षपछि क्लबको लागि पहिलोपटक सुरुवातत गरेका थिए । उनलाई दोस्रो हाफमा चोटग्रस्त मार्कुस थुरामले प्रतिस्थापन गरेका थिए ।

इन्टर र मोन्टेरीको खेलमा एउटा संयोग भने बनेको छ । गोल गर्दै दुवै विश्वकप विजेता खेलाडी हुन् । रामोससहितको स्पेनले सन् २०१० मा विश्वकप जितेको थियो । मार्टिनेजसम्मिलित अर्जेन्टिना विश्वकपको साविक विजेता हो ।

यो बराबरीले दुवै टोलीलाई घाटा भएको छ । अर्को चरण प्रवेशका लागि बाँकी खेलहरूमा दुवैका लागि जित आवश्यक पर्नेछ ।

फिफा क्लब विश्वकप : रिभर प्लेट विजयी हुँदा डर्टमुन्ड बराबरीमा