अमेरिकी सीमामा एक लाख डलरभन्दा बढीको कोकिन बरामद, हिडाल्गो नाकामा सुरक्षा सतर्कता सफल

हिडाल्गो, टेक्सस।

अमेरिकी भन्सार तथा सीमा सुरक्षा अधिकारीहरूले टेक्सस राज्यको हिडाल्गो भन्सार नाकामा ठूलो परिमाणमा कोकिन बरामद गरेका छन्। शनिबार भएको उक्त कारवाहीमा करिब १० लाख डलरभन्दा बढी मूल्य बराबरको कोकिन फेला पारिएको हो।

सुरक्षाकर्मीहरूले २०२० मोडेलको रेनो ओरच गाडीलाई शंका लागेपछि रोकि थप जाँच गरेका थिए। प्रारम्भिक जाँचमा तालिम प्राप्त कुकुरले लागूऔषधको संकेत दिएपछि, आधुनिक उपकरण प्रयोग गरी गाडीको भित्री भाग स्क्यान गरिएको थियो। स्क्यानमा शंकास्पद संकेत देखिएपछि सुरक्षाकर्मीहरूले भित्र गहिरो निरीक्षण गरे।

जाँच गर्दा, गाडीको गोप्य ठाउँमा कोकिन राखिएका ३० वटा प्याकेट फेला परे। ती प्याकेटहरूको कुल तौल ३४.९० किलोग्राम (झन्डै ७७ पाउण्ड) रहेको र यसको बजार मूल्य १,०२७,३१६ अमेरिकी डलर बराबर हुने अनुमान गरिएको छ।

हिडाल्गो भन्सार नाकाका निर्देशक कार्लोस रोड्रिग्वेज भन्छन्, “कोकिनको यस्तो ठूलो परिमाणमा बरामद हुनु हाम्रो सुरक्षाकर्मीहरूको दक्षता, प्रविधिको प्रयोग, र सीमालाई सुरक्षित राख्ने अठोटको प्रमाण हो।”

हाल बरामद कोकिन र प्रयोग गरिएको सवारी साधन दुवै सुरक्षाकर्मीहरूको नियन्त्रणमा छन्। घटनाबारे थप अनुसन्धान अमेरिकी गृह सुरक्षा विभागको सुरक्षा अनुसन्धान इकाइ (HSI) ले अघि बढाएको छ।

स्रोतका अनुसार, यस किसिमको लागूऔषध तस्करीको प्रयास मेक्सिको-टेक्सस सीमामा दोहोरिंदै आएको छ, तर पछिल्लो समय सीमामा कडा निगरानी, कुकुर सहायता, प्रविधिको प्रयोग र सुरक्षा सतर्कता बढाइएकाले यस्ता गिरोहहरू असफल हुन थालेका छन्।

यो घटनाले अमेरिका–मेक्सिको सीमामा लागुऔषध तस्करी कति जटिल र संगठित छ भन्ने देखाउँछ। तर, त्यसलाई विफल पार्न सुरक्षाकर्मीहरू पनि उच्च सतर्कता, दक्षता र प्रविधिको भरपुर प्रयोग गर्दै छन्। यसले लागूऔषध विरुद्धको लडाइँमा सकारात्मक सन्देश दिएको छ।