सरकारलाई केपी ओलीको प्रश्न : लिम्पियाधुरा, लिपुलेक र कालापानी नेपालमा पर्छ कि पर्दैन ?
काठमाडौं । प्रतिनिधि सभामा विपक्षी दलका नेता केपी शर्मा ओलीले भारतसँग नेपालको सीमा समस्या र भूमि मिचिएको कुरा प्रष्ट रूपमा राख्नु पर्ने बताउनुभएको छ ।
आइतबार प्रतिनिधि सभा बैठकमा सरकारको नीति तथा कार्यक्रम माथिको छलफलमा भाग लिँदै ओलीले अहिलेको सरकारबाट मातृभूमिको संरक्षण हुन कठिन भएको बताउनुभयो । ‘लिम्पियाधुरा, लिपुलेक र कालापानी नेपालमा पर्छ कि पर्दैन ? यो सरकारलाई थाहा भएको देखिँदैन’, उहाँले भन्नुभयो ।
सरकारको नीति तथा कार्यक्रममा नेपालको भूभाग समेटिएको चुच्चे नक्सा अटाउन नसकेको भन्दै उहाँले आलोचना गर्नुभयो । सो विषयमा सरकारको नीति तथा कार्यक्रम नबोलेको ओलीले बताउनुभयो ।
भारत नेपालको मित्र भएकोले आफ्नो मित्रसँग खुल्ला कुरा गर्नुपर्ने ओलीले बताउनुभयो । समस्याका कारण र समाधानको उपायको बारेमा खुल्ला कुरा गर्नुपर्नेमा उहाँले जोड दिनुभयो । ‘लिम्पियाधुरा, लिपुलेक र कालापानी क्षेत्रको अवस्था के छ अहिले ? के छ त्यहाँ, सीमा सुरक्षित नै छ ?’ उहाँले प्रश्न गर्नुभयो ।
देशको सवालमा बोल्दा, देशको सीमाको बारेमा बोल्दा, देशको समस्याका बारेमा बोल्दा आफूलाई एउटा मिडियाले किन जेल नहालेको भनि लेखेको भन्दै ओलीले आलोचना गर्नुभयो । कि सरकारको धारणा पनि त्यही हो ? भन्दै उहाँले प्रश्न गर्नुभयो ।
कालापानी क्षेत्रमा भारतले संरचना बनाइरहेको भन्ने सुनिएकोले त्यस विषयमा सरकारले सदनलाई जानकारी दिनुपर्ने ओलीले बताउनुभयो । उहाँले सभामुख मार्फत सो कुराको जानकारी गराउन प्रधानमन्त्रीसँग माग गर्नुभयो ।
What's Your Reaction?