एमालेले जनसंगठन विस्तारको लागि व्यापक बनौँ/बनाऔँ कार्यक्रम सञ्चालन गर्ने
काठमाडौं । नेकपा एमालेले अब व्यापक बनौँ/बनाऔँ कार्यक्रम सञ्चालन गर्ने भएको छ । पार्टीको जनसंगठन सुदृढीकरण तथा विस्तार कार्यक्रम अन्तर्गत सो अभियान सञ्चालन गर्ने नेकपा एमालेले जनाएको छ । स्थानीय तहका सबै वडामा महिला, किसान, मजदुर, युवा, विद्यार्थी जस्ता आधारभूत तहका जनसंगठन विस्तार गर्न व्यापक बनौँ र बनाऔँ कार्यक्रम सञ्चालन गर्ने एमाले सचिवालय बैठकले निर्णय गरेको हो ।
आधारभूत तहमा पार्टी कार्यकर्ता निर्माण गर्न जनसंगठनलाई इन्कुभेसन सेन्टरको रूपमा रूपान्तरित गर्ने एमालेले जनाएको छ । सबै जनसंगठनले मूलतः गैर पार्टी सदस्यलाई संगठित गरी पार्टीको जनआधार विस्तार गर्ने निर्णय बैठकले गरेको छ ।
पार्टीले जनसंगठनलाई पार्टी सदस्यता विस्तारको प्रवेशद्वारका रूपमा प्राथमिकता दिने भएका छ । यस कामको समन्वय जनसंगठन समन्वय संयन्त्रमार्फत गर्ने र प्रदेश, जिल्ला र पालिकास्तरमा समेत समन्वय संयन्त्र गठन गर्ने निर्णय पार्टीले गरेको छ । यस्ता संयन्त्र पालिका तहसम्म नै विस्तार गरिने भएको छ ।
जनसंगठन सञ्चालन प्रभावकारी ढङ्गले गर्न हरेक प्रदेशमा एक/एक जना केन्द्रीय सदस्यलाई केन्द्रीय जनसंगठन समन्वय संयन्त्रको प्रतिनिधिको रूपमा खटाउने निर्णय बैठक गरेको छ । यो जिम्मेवारी पाउने केन्द्रीय सदस्यले केन्द्रीय र प्रदेशको जनसंगठन समन्वय संयन्त्र बिच समन्वय र सहजीकरणको काम गर्ने छन् ।
What's Your Reaction?