हाम्रो

हाम्रो
प्रजातन्त्रका लागि हामी थियौं
तर त्यो प्रजातन्त्र हाम्रो थिएन
भनिएको जनयुद्धमा मर्ने हामी थियौं
तर त्यो युद्ध हाम्रो थिएन।
दोस्रो जन-आन्दोलन भन्यौ हामी नै मर्यौं
यो आन्दोलन पनि हाम्रो थिएन।
सही गर्ने त हामी नै थियौ
तर बाह्रबुँदे पनि हाम्रो थिएन।
नाम फेरिदिए लोकतन्त्र भन्नलाए
रमायौं,तर त्यो पनि हाम्रो थिएन ।
संविधान हाम्रो भन्छौं
होइन
परिवर्तन हाम्रो भन्छौं
होइन
अदालत हाम्रो भन्छौं
होइन
सरकार हाम्रो भन्छौ
होइन
नेता हाम्रो होइन
दल हाम्रो होइन
न फैसला हाम्रो हो
न विभाजन हाम्रो हो
न योग हाम्रो हो
न महाअभियोग हाम्रो हो।
देश हाम्रै हो भन्दै छौं
यो पनि होइन हुनसक्छ
अनुदान चिहान हुनसक्छ
भ्रम बिहान हुनसक्छ
हाम्रो लागि हामी भएर
उठ्यौं भने मात्र
सबै हाम्रो हुनसक्छ ।