महिला टी–२० विश्वकप : दक्षिण अफ्रिका फाइनलमा, छ पटकको च्याम्पियन अष्ट्रेलिया ८ विकेटले पराजित

काठमाडौं । महिला टी–२० विश्वकप २०२४ को पहिलो सेमिफाइनलमा दक्षिण अफ्रिकाले डिफेन्डिङ च्याम्पियन एवं छ पटकको विश्व च्याम्पियन अष्ट्रेलियालाई ८ विकेटले हरायो। बिहीबार दुबई अन्तर्राष्ट्रिय रंगशालामा दक्षिण अफ्रिकाले टस जितेर पहिले बलिङ गर्ने निर्णय गरेको थियो ।

अष्ट्रेलियाले पहिले ब्याटिङ गर्दै २० ओभरमा ५ विकेट गुमाएर १३४ रन बनायो। जवाफमा दक्षिण अफ्रिकाले १७.२ ओभरमा २ विकेट गुमाएर लक्ष्य हासिल गर्‍यो। एनेके बोशले नटआउट ७४ रन बनाइन्। उनलाई खेलको उत्कृष्ट खेलाडी चुनियो।

दक्षिण अफ्रिकाको टोलीले प्रतियोगिताको फाइनलमा लगातार दोस्रो पटक स्थान बनायो। टी–२० विश्वकपको इतिहासमा दक्षिण अफ्रिका पहिलो पटक अष्ट्रेलियाको टोलीलाई हराउन सफल भयो।

एनेके बोश खेलको उत्कृष्ट खेलाडी

अष्ट्रेलियाको टोली दक्षिण अफ्रिकाको बलिङ सामु २० ओभरमा ५ विकेटमा १३४ रन मात्र बनाउन सक्यो। अष्ट्रेलियाका लागि विकेटकिपर बेथ मूनीले सबैभन्दा बढी ४४ रन बनाइन्। कप्तान ताहलिया म्याकग्राले २७ रनको योगदान दिइन्। अन्त्यमा एलिस पेरीले २३ बलमा ३१ रन र फोबे लिचफिल्डले ९ बलमा नटआउट १६ रनको पारी खेलिन्।

यसको जवाफमा दक्षिण अफ्रिकाको टोलीले शानदार सुरुवात गर्‍यो। कप्तान लौरा वोल्वार्डले पारीको आरम्भ गर्दै ४२ रनको पारी खेलिन्। त्यसपछि एनेके बोशले ४८ बलमा नटआउट ७४ रनको पारी खेलेर आफ्नो टोलीलाई जित दिलाइन्। उनले आफ्नो पारीमा ८ चौका र एक छक्का प्रहार गरिन्।

अष्ट्रेलियाले फाइनल खेल्न पाउने छैन

६ पटकको च्याम्पियन अष्ट्रेलिया महिला टी–२० विश्वकपको नौ संस्करणमा केवल दोस्रो पटक फाइनलभन्दा पहिले बाहिरियो। यति मात्र होइन, सन् २००९ पछि पहिलो पटक अष्ट्रेलियाको टोली फाइनल खेल्न पाउने छैन।

अघिल्लो फाइनल यिनै दुई टोलीबीच भएको थियो

सन् २०२३ को फाइनल यिनै दुई टोलीबीच खेलिएको थियो। त्यसमा अष्ट्रेलियाले दक्षिण अफ्रिकालाई हराएर उपाधि जितेको थियो। यसरी दक्षिण अफ्रिकाले हारको बदला पनि चुक्ता गर्‍यो।