अध्यादेशबारे झलनाथ- ओली दुईतर्फी धार भएको हतियार चलाउन उद्यत छन्, हाम्रा सांसद एमाले जाँदैनन्

काठमाडौं । नेकपा (एकीकृत समाजवादी) का सम्मानित नेता झलनाथ खनालले प्रधानमन्त्री केपी शर्मा ओली दुईतर्फी धार भएको हतियार चलाउन उद्यत रहेको टिप्पणी गरेका छन् ।

सोमबार नेपालभ्युजसँग कुराकानी गर्दै नेता खनालले प्रधानमन्त्री ओलीले अध्यादेश ल्याउन लागेको जानकारीमा आफूले पनि पाएको उल्लेख गर्दै यस्तो बताएका हुन् ।

“अध्यादेश ल्याउने तयारी भएको मैले पनि सुनेँ तर, यो कसैको हितमा हुँदैन । सुरुमा त सरकारलाई नै काट्छ यसले । यो दुईतर्फी धार भएको हतियार हो,” नेता खनालले भने ।

नेता खनालले प्रधानमन्त्री ओलीले जेका लागि अध्यादेश ल्याउन लागेका हुन्, त्यसको औचित्य पुष्टि नहुने दाबी गरे । “मैले हेर्दाखेरि हाम्रा सांसदहरू त्यता (एमालेमा) जाँदैनन् । पार्टीभित्र त्यस्ता चर्चा केही छैन,” नेता खनालले भने, “केही नेता/सांसदको चर्चा छ । उनीहरू पनि जाँदैनन् ।”

नेता खनालले अध्यादेश ल्याउने कुरामा प्रमुख सत्ता साझेदार दल नेपाली कांग्रेसको सहमति नरहने दाबीसमेत गरे । प्रधानमन्त्री ओलीको अध्यादेश ल्याउने रणनीति सबैभन्दा ठूलो दल एमाले बनाउनेसँग सम्बन्धित रहेको उल्लेख गर्दै भने, “संसद्‌मा आफूभन्दा ठूलो दल बनोस् भन्ने त कांग्रेस चाहँदैन होला । त्यसैले यहाँ कांग्रेसको सहमति रहँदैन ।”

अध्यादेश आइहाल्यो भने नि ? भन्ने जिज्ञासामा उनले भने, “यदि कांग्रेसकै सहमतिअनुरूप अध्यादेश आयो भने पनि त्यसले सरकार र त्यहाँ रहेका दलहरूलाई अगाडि घाटा गर्छ । त्यसैले यो कसैको हितमा छैन ।”

यता प्रधानमन्त्री ओलीले भने एकीकृत समाजवादी विभाजनका लागि सहज हुनेगरी अध्यादेश ल्याउने तयारी गरेका छन् । अध्यादेशको ड्राफ्ट सिंहदरबारमा तयार भइसकेको स्रोत बताएको छ ।

• सम्बन्धित समाचार

एकीकृत समाजवादीको एक समूह एमालेमा मिसाउन अध्यादेशको सहारा !