प्रचण्ड भन्छन् – ३२ सिटको जादू नम्बर अझै छ, सरकारलाई उल्ट्याउने हाम्रै पार्टी हो

काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले ३२ सिटको जादू नम्बर अझै रहेको बताएका छन् ।

शनिबार माओवादी काभ्रे काठमाडौं सम्पर्क समितिको भेलालाई सम्बोधन गर्दै उनले यस्तो बताएका हुन् । जादू सीटकै कारणले अहिले नै चिन्तित हुनुपर्ने कारण नरहेको उनको भनाइ छ ।

‘यही हलमा हो, तामाङ राष्ट्रिय मुक्ति मोर्चाको सम्मेलन थियो । मैले ३२ को हाम्रो संख्यालाई जादूको संख्या भनेको थिएँ, मेरो यही भनाइले उनीहरू अझै बढी उद्वेलित र तरंगित पनि भए होलान् ।’ उनले भने, ‘मैले त्यो नभनेको भए पनि हुन्थ्यो होला तर, पनि अहिले पनि हाम्रो संख्या म्याजिक नै छ भन्छु ।’

३२ सिट भए पनि यो सरकारलाई उल्ट्याएर आफ्नो पार्टीको सरकार हुने उनको भनाइ छ ।