उपचारको नाममा भारतीयद्वारा ठगी धन्दा

रौतहट। 

 भारतीय महिला पुरुषहरुको गिरोहले उपचारको नाउँमा ठगी धन्दा चलाइरहेको प्रकाशमा आएको छ।
रौतहटसंग जोडिएको भारतीय सहर बैरगनियाका महिला पुरुषको गिरोह केही नेपालीलाई दलालको रूपमा परिचालन गरी जिल्लाको कैयौँ ठाउँमा उपचारको नाममा सर्वसाधारणको लाखौँ रुपैयाँ ठगी गरिरहेको प्रकाशमा आएको हो।

बैरगनियाकी प्रियंका कुमारी नाम गरेकी एकजना महिलाले अगुवाइ गरेको गिरोहले कटहरिया नगरपालिका- ५ स्थित एकजना स्थानीय महिला र एकजना पुरुषलाई दलालको रूपमा परिचालन गरेका थिए।उनीहरू गाउँमा असाध्य रोग लागेका बिरामीलाई भेटेर प्रियंकाले दिने औषधिले बिना डाक्टर सबै रोग निको हुन्छ भनेर प्रचारप्रसार गर्दै आएका थिए।

भारतीय महिला प्रियंकाको नेतृत्वमा आउने गिरोह कटहरिया स्थित खाने पानीको कार्यालय छेउमा एउटा घर भाडामा लिएर प्रत्येक बिहीबार त्यहाँ दर्जनौं बिरामीलाई जम्मा गरेर उनीहरूलाई भ्रमित हुने गरी भाषण दिएर प्रभावमा पार्ने गरेका थिए।

 प्रियंकाले आफू बिरामीहरुलाई निको पार्ने संकल्प लिएर अहिलेसम्म बिहे नगरी घरबाट तपाईँहरुको सेवामा लागेको छु बताउँदै आएकी छिन् ।

एकजना बिरामीका अभिभावक सर्फलाल महतोका अनुसार प्रियंकाले डीएक्स एन फार्मा कम्पनी मलेसिया र भारत हैदराबादबाट उत्पादित औषधिले जुन सुकै रोग निको हुन्छ यसमा डाक्टर चाहिँदैन भनेर जनही ५ देखि १० हजार रुपैयाँ उठाएर केही औषधि सेवनका लागी दिने गरेका थिए।

 प्रियंकाकै कुराको भरमा आमाको लागी ७ हजारको औषधी किनेर ठगिएको महतोले बताए। कटहरिया ५ मा मात्र ७५ जना बिरामीलाई उक्त गिरोहले कैयौं महिना देखि उपचारको नाउँमा लाखौं रुपैयाँ ठगेको महतोले बताएका छन्।

स्थानीय दलालसँग नम्बर लिएर भारतीय महिला प्रियंकासँग न्युज कारखानाले कुरा गर्दा तपाईँ बिरामी खोज्नुस , अन्य दलाल सरह मासिक तपाईँको खातामा पनि पैसा पठाउने बताएकी थिइन्। 

हामी जोडेको कम्पनीको औषधिको लागि डाक्टर चाहिँदैन, सबै रोग निको हुन्छ, सामान्य जानकारी चाहियो भने बैरगनिया आउनुस, विस्तृत जानकारीको लागि मंगलवार सीतामढी आउनुस त्यहाँ गुरुजी आउनु हुन्छ भनेकी थिइन्।

यही सन्दर्भमा जिल्ला प्रहरी प्रमुख एसपी दिलीप घिमिरेलाई जानकारी गराउँदा उनको निर्देशनमा इलाका प्रहरी कार्यालय कटहरियाका प्रमुख सई मुकेश कुमार सिंहको नेतृत्वमा गएको टोलीले उपचारको नाउँमा ठगी  गर्ने भारतीय गिरोहलाई भगाएको थियो।

गिरोहको केही महिलाहरुले भारतीय सहर बैरगनियाबाट लागिरहेको डीएक्स एन फार्मा कम्पनीको औषधी गौर भन्सार नजिकै प्रहरीले बरामद गरेको थियो।
बरामद औषधी नेपालमा दर्ता नरहेको औषधी ब्यवस्था बिभाग बिरगंजले बताएपछि आवश्यक कार्यवाहीको लागी जिल्ला भन्सार कार्यालय गौरमा बुझाइएको जिल्ला प्रहरी प्रवक्ता डिएसपी दीपक कुमार रायले बताएका छन्।

यसरी उपचारको नाउँमा कटहटियामा हुनेगरेको ठगी धन्दा न्युज कारखाना र प्रहरीको सक्रियताले बन्द भएको छ । ठगी गिरोह आउन छोडेका छन्।तर जिल्लाको अन्य क्षेत्रमा पनि यस्तो गिरोह सक्रिय भएर गाउँ गाउँमा स्थानीयलाई दलाल बनाएर सैयौं नेपालीलाई उपचारको नाउँमा ठगी रहेको प्रत्यक्षदर्शीले बताएका छन्। उपचारको नाउँमा भारतीयबाट भइरहेको ठगी नियन्त्रण गर्न प्रहरी प्रशासनसंगै जनप्रतिनिधि र नागरिक समाजको ध्यान जान जरुरी रहेको छ।

सञ्जय मिश्रा