एनपीएल : नेपाली क्रिकेटमा युगान्तकारी सुरुवात

काठमाडौं । नेपाल प्रिमियर लिग (एनपीएल) २०२४ को तयारी तीव्र रूपमा अघि बढिरहेको छ । नेपाली क्रिकेटलाई विश्व मञ्चमा स्थापित गर्ने महत्त्वाकांक्षा सहित सुरु हुन लागेको यो लिगले अन्तर्राष्ट्रिय खेलाडी, उत्कृष्ट व्यवस्थापन, र व्यापक दर्शकको ध्यान तान्ने अपेक्षा गरिएको छ ।

क्रिकेट एसोसिएसन अफ नेपाल (CAN) द्वारा आयोजित यो फ्रेन्चाइज टी–२० लिगमा आठ टोलीले प्रतिस्पर्धा गर्नेछन् । कुल ३२ खेल तीन हप्ता भित्र काठमाडौंको त्रिवि अन्तर्राष्ट्रिय क्रिकेट मैदानमा आयोजना हुनेछन् ।

एनपीएलका टोली

एनपीएलमा देशका प्रमुख क्षेत्रलाई प्रतिनिधित्व गर्ने आठ टोलीले भाग लिनेछन् । यीमध्ये पाँचवटाको नाम प्रमुख शहर र ३ वटाको नाम प्रदेशबाट राखिएको छ । ती हुन्-

• विराटनगर किङ्स
• जनकपुर बोल्ट्स
• कर्णाली याक्स
• काठमाडौं गुर्खाज
• लुम्बिनी लायन्स
• पोखरा एभेन्जर्स
• चितवन राइनोज
• सुदूरपश्चिम रोयल्स

प्रत्येक टोलीमा कम्तिमा १६ जना खेलाडी हुनेछन् । अक्टोबर ६ मा आयोजित अक्सनमार्फत ८० खेलाडी छनोट गरिएका थिए । प्रत्येक टोलीले ४ जना विदेशी खेलाडी र एक स्थानीय आइकनिक खेलाडी राख्नैपर्ने प्रावधान छ ।

अन्तर्राष्ट्रिय खेलाडीको सहभागिता

एनपीएललाई ग्लोबल स्तरमा पुर्‍याउन विभिन्न चर्चित विदेशी खेलाडी सहभागी हुँदैछन् ।
शिखर धवन (भारत)– कर्णाली याक्स
मार्टिन गुप्टिल (न्यूजिल्यान्ड) – विराटनगर किंग्स
जेम्स निशाम (न्यूजिल्यान्ड) – जनकपुर बोल्ट्स
राशिद खान (अफगानिस्तान) – काठमाडौं गुर्खाज
बेन्क कटिङ (अष्ट्रेलिया)– लुम्बिनी लायन्स

यी खेलाडीको सहभागिताले नेपाली क्रिकेटलाई अन्तर्राष्ट्रिय पहिचान दिलाउने अपेक्षा गरिएको छ ।

स्टार स्पोर्ट्सबाट प्रसारण : नेपाली लिगमा भारतीय कम्पनीको महत्त्वपूर्ण योगदान

स्टार स्पोर्ट्सले नेपाल प्रिमियर लिग (एनपीएल) का लागि ग्लोबल प्रसारण अधिकार प्राप्त गरेको छ । यो भारतीय प्रसारण कम्पनीले एनपीएललाई १०० भन्दा बढी देशमा प्रत्यक्ष प्रसारण गर्न मद्दत पुर्‍याउनेछ । यसको कारणले नेपाल क्रिकेटको स्तर अन्तर्राष्ट्रिय मञ्चमा पुग्ने निश्चित छ ।

भारतका ठूला ब्रान्डको समर्थन र स्टार स्पोर्ट्सको प्रभावी व्यवस्थापनले एनपीएललाई थप चर्चित र विश्वस्तरीय बनाउने छ । एनपीएलका खेलको उत्कृष्ट प्रसारण र आधुनिक प्रविधिको प्रयोगले दर्शकलाई अझ बढी रोमाञ्चक बनाउने छ ।

यसका साथै, स्टार स्पोर्ट्सको सहभागिताले नेपालमा क्रिकेटको लोकप्रियता बढाउने र भविष्यमा अन्तर्राष्ट्रिय खेलकुद आयोजनामा पनि सहयोग पुर्‍याउने छ ।

स्टार स्पोर्ट्स र डिज्नींहट स्टारमार्फत एनपीएलका खेल विश्वका १०० भन्दा धेरै मुलुकमा हेर्न सकिनेछ । उन्नत प्रविधि ड्रोन क्यामेरा, ३६०-डिग्री भ्यू, र विश्लेषणात्मक साधनको प्रयोग हुनेछ । यो कदमले नेपाली क्रिकेटलाई अन्तर्राष्ट्रिय क्रिकेटप्रेमीमाझ स्थापित गर्न महत्त्वपूर्ण भूमिका खेल्नेछ ।

एनपीएलका फाइदा र विशेषता 

अक्सनमा सबैभन्दा धेरै खर्चिने टोली – लुम्बिनी लायन्स (८४.७५ लाख रुपैयाँ)
सबैभन्दा कम खर्चिने टोली – चितवन राइनोज (६३ लाख रुपैयाँ)

मुख्य खेलाडी-

विराटनगर किङ्स –सन्दीप लामिछाने, अकिब इल्यास, निकोलस किर्तन, क्रिस सोल, मार्टीन गप्टिल,  इस्मत आलम

कर्णाली याक्स – शिखर धवन, हुसेन तलात, बाबर हायात, चाडविक वाल्टन, शिखर धवन

जनकपुर बोल्ट्स– आसिफ शेख, जिमी निशम, जोशुवा ट्रम्प, मोहम्मद मोहसिन, लाहिरु मिलन्था, सोयब मक्शुद

काठमाडौं गुर्खाज–करण केसी, नाथन सोटर, माइकल लेभिट, सन एस्किनान्जी, जेहार्ड एरास्मस र ड्यान डौथेवेट

लुम्बिनी लायन्स–रोहित कुमार पौडेल, टोम मुर्स, बेन कटिङ, उन्मुक्त चन्द

पोखरा एभेन्जर्स–कुशल भूर्तेल, आन्द्रेस गौस, बास डि लिडे, म्याट क्रिचली, रेमन राइफर, माइकल लिस्क

चितवन राइनोज–कुशल मल्ल, मार्चन्ट डे लांग, ल्यूक मार्टिन बेनकेन्स्टाइन, जान लिफ्टी इटन, हसन इसाखिल

सुदूरपश्चिम रोयल्स–ब्रान्डन म्यामलेन, सेफ जेब, स्कट कुगेलेइन र रोहन मुस्ताफा ।

उच्च पुरस्कार राशी

एनपीएलमा भएको बृहत लगानीले सबैको ध्यानकर्षण गरिरहँदा खेल समर्थकमाझ यसको पुरस्कार राशी कति होला भने चर्चा चलिरहेको छ । समर्थक पनि एनपीएलको पुरस्कार राशी थाहा पाउन आतुर छन् ।

यद्यपि, नेपाल क्रिकेट संघ (क्यान)ले यसको औपचारिक घोषणा भने गर्न बाँकी नै छ । तथापि, पुरस्कार राशी आकर्षक हुने अनुमान गरिएको छ ।

पर्यटन प्रवर्द्धनमा सहयोग

अन्तर्राष्ट्रिय खेलाडी र समर्थकको आगमनले नेपालमा खेल पर्यटनलाई प्रवर्द्धन गर्नेछ ।

युवा प्रतिभा विकास

टोलीमा पाँचभन्दा बढी नेपाली खेलाडी अनिवार्य समावेशीकरणले स्थानीय युवा खेलाडीलाई अन्तर्राष्ट्रिय मञ्चमा चम्किने मौका दिनेछ ।

लिगसँग जोडिएका अन्य फाइदा

टोलीको मुख्य प्रायोजकका रूपमा ब्रान्डले आफ्नो नाम र लोगो व्यापक रूपमा प्रचार गर्न सक्छन् । मैदानमा विभिन्न प्रकारका डिजिटल र फिजिकल विज्ञापनको व्यवस्था उपलब्ध छ ।एनपीएलसँग सम्बन्धित विविध कार्यक्रमको सहआयोजक भएर ब्रान्डको प्रचार गर्न सकिनेछ ।

समाज र अर्थतन्त्रमा सकारात्मक प्रभाव

एनपीएलले नेपाली क्रिकेटलाई मात्र होइन, नेपालको पर्यटन, खेलकुद, र आर्थिक क्षेत्रमा समेत ठूलो योगदान पुर्‍याउनेछ । विदेशी खेलाडी, प्रशिक्षक, र व्यवस्थापनको आगमनले नेपालको संस्कृति र आतिथ्यलाई पनि विश्वसामु चिनाउने अवसर सिर्जना गर्नेछ ।

एनपीएल २०२४ नेपाली क्रिकेटका लागि नयाँ अध्यायको सुरुवात हो । यसले नेपाली खेलकुदलाई अन्तर्राष्ट्रिय मञ्चमा पुर्‍याउनुका साथै नेपाललाई क्रिकेटको नयाँ केन्द्रको रूपमा स्थापित गर्न सहयोग पुर्‍याउनेछ ।

“एनपीएलको यो यात्रा केवल खेलमात्र होइन, नेपाली पहिचानको वैश्विक विस्तार हो ।”