माइक्रोबस र ट्रक एकआपसमा ठक्किँदा २२ जना घाइते, १३ को अवस्था गम्भीर

काठमाडौं । पूर्व-पश्चिम राजमार्गअन्तर्गत पश्चिम नवलपरासीको सुनवल नगरपालिका-७ अलकत्रे डाँडामा माइक्रोबस र ट्रक एकआपसमा ठक्किँदा २२ जना यात्रु घाइते भएका छ्न् ।

बर्दघाटबाट बुटवल जाँदै गरेको लु १ ख ९४६७ नम्बरको माइक्रोबस र सुदूरपश्चिम प्रदेश ०१-००१ ख २४४२ नम्बरको ट्रक शुक्रबार एक आपसमा ठक्कर खाँदा दुर्घटना भएको जिल्ला प्रहरी कार्यालय पश्चिम नवलपरासीले जनाएको छ ।

प्रहरीका अनुसार साइकल यात्रीलाई ठक्कर दिएपछि अनियन्त्रित भएको माइक्रोबस ट्रकसँग ठोक्किएको हो ।

घाइतेमध्ये १३ जनाको अवस्था गम्भीर रहेको र उपचारका लागि रुपन्देहीको भलुहीस्थित देवदह मेडिकल कलेज लगिएको बताइएको छ ।

घटनाबारे थप अनुसान्धान भइरहेको प्रहरीले जनाएको छ ।