जागरणसभा स्थलमा फोहोर गरेको भन्दै एमालेलाई महानगरको जरिवाना

काठमाडौं ।  काठमाडौं महानगरपालिकाले एमालेलाई १ लाख रुपैयाँ जरिवाना गराएको छ ।

दरबारमार्गस्थित खुला सडकमा जागरण सभा गर्ने क्रममा सडक तथा सडकपेटीमा जथाभावी फोहरमैला गरी वातावरण प्रदूषण गरेको भन्दै १ लाख रुपैयाँ जरिवाना गराएको महानगरका नगर प्रहरी निरीक्षक लिलाराज गाछाले एक सूचनामार्फत जानकारी दिएका छन् ।

गाछाले जारी गरेको सूचनामा एमालेलाई सम्बोधन गर्दै भनिएको छ,‘प्रस्तुत विषयमा मिति २०८१ मंसिर ७ गते काठमाडौं महानगरपालिका वडा नं.१ दरबारमार्गस्थित खुला सडकमा जागरण सभा गर्ने क्रममा सडक तथा सडकपेटीमा जथाभाबी फोहरमैला गरी वातावरण प्रदूषण गरेकोले तपाईँलाई फोहरमैला व्यवस्थापन ऐन, २०६८ र काठमाडौँ महानगरपालिकाको आर्थिक ऐन, २०८१ बमोजिम रु.१००,०००/०० अक्षरुपी एक लाख जरिवाना गरिएको ब्यहोरा निर्देशानुसार अनुरोध गर्दछु ।’

एमालेले  शुक्रबार काठमाडौंको दरबारमार्गमा जागरण सभा गरेको थियो ।