प्रत्येक दिन २० जनाले आत्महत्या गर्ने गरेकाे तथ्याङ्क

काठमाडौँ, ८ पुस । प्रतिनिधिसभाको महिला तथा सामाजिक मामिला समितिले दिनानुदिन बढ्दै गइरहेको आत्महत्या समस्या समाधानका सम्बन्धमा छलफल गरेको छ ।

समितिको आज सिंहदरबारमा बसेको बैठकमा सांसदहरुले आत्महत्या बढ्दै जानुको कारण पत्ता लगाइ तत्काल योजना बनाएर काम गर्न नसके आत्महत्या दर बढ्दै जाने विचार व्यक्त गर्नुभयो ।

आत्महत्याका घटना हुनुअघि उपचारात्मक कार्यक्रम सञ्चालन गर्न सरकारलाई सांसदहरुले सुझाव दिनुभयो ।

नेपालको स्वास्थ्य क्षेत्रमा ठूलो समस्याका रुपमा देखिएको मानसिक स्वास्थ्यका लागि सरकारले अलग्गै बजेट छुट्याउनुुपर्नेमा जोड दिँदै सांसदहरुले रोजगारी तथा पेसा व्यवसायमा आम नागरिकलाई अवसर प्रदान गर्नुपर्ने विचार व्यक्त गर्नुभयो ।

बैठकमा स्वास्थ्य तथा जनसङ्ख्या मन्त्रालयका सचिव डाक्टर रोशन पोखरेलले आत्महत्या एउटा रोग भएकाले बेलैमा समस्या समाधान नगरे विकराल अवस्था आउने बताउनुभयो ।

प्रत्येक दिन २० जनाले आत्महत्या गर्ने तथ्याङ्क रहेको उल्लेख गर्दै सचिव पोखरलेले एक सय बेडभन्दा बढीका अस्पतालहरूमा अनिवार्य एकजना मानसिक स्वास्थ्य चिकित्सक खटाइएको जानकारी गराउनुभयो ।

समुदाय स्तरमा मानसिक स्वास्थ्यसम्बन्धी सचेतनाका लागि सरकारले प्राथमिकताका साथ कार्यक्रम सञ्चालन गर्दै आएको जानकारी गराउँदै सचिव पोखरेलले कुल बजेटको एक दशमलव आठ प्रतिशत मानसिक स्वास्थ्यमै खर्च गरिएको बताउनुभयो ।

बैठकमा गृह मन्त्रालयका सहसचिव भरतमणि रिजालले आर्थिक भार, असफल प्रेम, बेरोजगार र हिंसाका कारण आत्महत्या गर्ने गरेको अध्ययनबाट देखिएको बताउनुभयो ।

आत्महत्या न्यूनीकरणका लागि नेपाल प्रहरीले कार्ययोजना बनाएर काम गरिरहेको सहसचिव रिजालले बैठकलाई जानकारी गराउनुभयो ।

The post प्रत्येक दिन २० जनाले आत्महत्या गर्ने गरेकाे तथ्याङ्क appeared first on Jhapa Online.